Inatsisartunut ilaasortap Inuit Nunaat nunatsinnut taaguutinngortikkusukkaa

- Inuiaat nukittuut imminnullu tatigisut nunamut tummaarisaminnut ukiorpasuit matuma siornatigut nunassissimammata nuannaarutigisarpara, inuit allat nunassiffigisaraluarlugu sivisunerusumik najorsinnaasimanngisaat naleqqussartuarnitsigut maanngamut kinguaat najorparput, Nikolaj Jeremiassen tunngavilersuivoq, imalu nangilluni:

- Uagutsinnillu inuiaat allat tatiginnittut ataqqinnittullu taasarpaatigut "Inuit". Piffissanngunnginnerluni siulitta ataqqinartut nunaminnut taaguutaat "Inuit Nunaat" utertillugu taaguutigileqqinnissaanut? Nikolaj Jeremiassen aperivoq.

Akilinermi Inuvialunni, Nunavumi, Nunavimmi Nunatsiavummilu Inuit nunartik ataatsimoortut Canadap ataani inissisimasut 2009-mi juuni tikillugu "Inuit Nunaannik" taaguuteqartissimagaat, Nikolaj Jeremiassenip ilanngullugu oqaatigaa, Canadamilu naggueqatigiit Inuit suliniaqatigiiffiata Inuit Tapiriit Kanatamip 2009-mi juunip ulluisa qulinganni ataatsimiinneranni, Canadami nunap immikkoortui qulaani taaneqartut "Inuit Nunangat"-imik taaguuteqalernissaat aalajangerneqarneqartoq aamma oqaatigalugu.

Nikolaj Jeremiassenillu taassuma saniatigut paaserusuppaa Naalakkersuisut Nunatsinni innuttaasunik taasititsiniarnersut, Kalaallit Nunaata Inuit Nunaannik taaguuteqalersinnaaneranik innuttaasut taasitinneqarnissaannut eqqarsaatersuuteqarnersut paaserusullugu.