Inatsisartuni ullormut pisussat
Immikkoortoq siulleq ippassaq oqaluuserisaqartussaagaluarluni ullumikkumut kinguartinneqarpoq, tassalu ingerlatseqatigiiffissuup KNI-p suliassaasa killilerneqarnerat pillugu siunnersuut, ilaatigut Polar Oilip KNI-llu siunissami avissaartinnissaannik imaqartoq.
Immikkoortoq tulleq sermip erngullu avammut nioqqutissatut atorluarneqarnissaannut tunngassuteqarpoq. Siunnersuutigineqartoq tamanit ilalerneqarpoq, pingaartumik innuttaasut imermik tunisassiortunut namminersortunut naleqqiullugit tamatigut salliutinneqartarnissaasa siunnersuummi erseqqissaatigineqarnera pissutigalugu.
Tamanna oqaluuserineqareerpat Namminersorlutik Oqartussat upalungaarsimanermut inatsisip Kalaallit Nunaannut atuuttussanngortinneqarnera pillugu kunngikkormiut peqqussutaannut akuersinissaat pillugu Inatsisartut aalajangiiffigisassaattut siunnersuut oqaluuserineqassaaq.
Siunnersuut tulliuttoq Inuit Ataqatigiinneersup Ane Hansenip siunnersuutigaa. Umiartortut kalaallit umiartortullu nunanit allaneersut sulinerminni atukkaminni illersorneqarnissaat siunertaralugu naligiinnissinneqarnissaat taassuma siunnersuutigaa.
Demokraatineersup Tillie Martinussenip MMS imaluunniit nittartakkatigut naapittarfitsigut tamataqanngitsunik assinik avitseqatigiittarnermut tunngasunik paasissutissiisarnerup meeqqat atuarfianni angajulliit atuartinneqarnerini eqqunneqarnissaa taassuma siunnersuutigaa.
Naalakkersuisut tamanna isumaqataaffigaat Meeqqallu atuarfiat pillugu inatsisip 2017-imi nalilersuiffigineqarneranut ilanngunneqarnissaa kissaatigalugu.
Immikkoortumi kingullermi Siumumeersut Suka K. Frederiksenip Jens Immanuelsenillu innaallagissap, erngup kiassarnerullu assigiimmik akeqartinneqarnerisa nalilersuiffigeqqinneqarnissaa kissaatigaat.
Siunnersuut taanna Naalakkersuisunit aamma akuersaarneqarpoq, taakkumi isumaqarput akinik aalajangersaariaaseq maanna atuuttoq naapertuilluanngitsoq pisariaqanngitsumillu pisariulluni.
