Inatsisartuni ullormut pisussat
Immikkoortoq siulleq oqaluuserineqartussaq tassaavoq erngup sermillu avammut nioqqutissatut atorneqarnissaat.
Nunanut allanut imermik pitsaasumik pisariartitsiffiusunut imermik avammut nioqqutissiulernissaq ukiorpassuarni kissaatigineqarpoq.
Avammulli nioqqutissiornissamik suliniutigineqartartut iluatsinngisaannarsimapput.
Aallartisarnissalli ajornannginnerulersinnissaa Naalakkersuisut maanna aqqutissiuunnialerpaat. Pisortat pilersuinermut suliffeqarfii pioreersut atorneqarnissaannut periarfissiiniarput, taamaaliornikkut avammut nioqqutissiornermik ingerlatseqatigiiffiit imermik tigooraanissamut atortorissaarutinik sanaartoqqaartariaarutissallutik.
Pisortat pilersuinermut suliffeqarfiisa imeqarfiinik pioreersunik atuinissamut akuersissuteqarnissamut najukkami innuttaasut pilersorneqarnerinut naammattunik isumalluutissaqarnissaa piumasaqaatigineqassasoq, Inuussutissarsiornermut naalakkersuisup erseqqissaatigaa.
Nunatsinnut suliffissarsiortut killilersimaarneqarnissaat pillugu Inatsisartut inatsisaata allanngortinneqarnissaa aamma oqaluuserineqassaaq. Nunatsinni suliffissat sapinngisamik annertunerpaamik sulisussanit najugaqavissunit inuttalerneqartarnissaat, kiisalu sulisussanik nunatta avataaneersunik pisariaqartitsinerup annikinnerulersinnissaa tamatumani siunertaavoq.
Kingullertullu qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata allanngortinneqarnissaa siullermeerneqassaaq.
Siunnersuutigineqartoq naapertorlugu, qimmit nappaataannut parvovirusimullu, Qeqertarsuup tunuani qimmit qimuttut arlallit siorna toqqutigisaannut, akiuussusersuineq inatsisitigut piumasaqaataalissaaq, perlerornermut akiuussusersuineq assigalugu.
Qimminik qimuttunik akiuussusersuinermut aningaasartuutit Namminersorlutik Oqartussanit akilerneqartassapput, qimminillu allanik akiuussutissiinermut aningaasartuutit piginnittut nammineq akilertassavaat.