Inatsisartuni ullormut pisussat
Ullormut oqaluuserisassaq siulleq uumasoqatigiinnik avataanit eqqussisarnermut tunngassuteqarpoq. Matumani uumasoqatigiit nunatsinniittuunngitsut pineqarput.
Nunarput qeqertatut tunillaassuisinnaasunut avataaneersunut sunnertiasuuvoq.
Nunap killeqarfii nunarsuarmioqataajartornerput ilutigalugu ammariartuinnarput tamatumalu kingunerisaanik Nunatta nammineerluni uumasut suut nunap killeqarfiatigooruttarnissaannut malittarisassaliortariaqalernera nukinginnartumik pisariaqalersimavoq, Aalisarnermut, Piniarnermut Nunalerinermullu Naalakkersuisoq uumasoqatigiinnik eqqussuisarneq pillugu inatsisip sukateriffigineqarnissaa pillugu tunngavilersuutimini taama allappoq.
Uumasoqatigiit nunatsinniittuunngitsut nappaatinik immikkut-ittunik nassataqarsinnaanerat matumani soorunami pineqarpoq, tamakkumi nunatta uumasuinut inuinullu navianaateqarsinnaammata.
Ullormut oqaluuserisassani immikkoortumi kingullermi kalaallit oqartussaaffiinut tunngatillugu pisortat ingerlatsinerat pillugu paasitinneqarsinnaatitaaneq pillugu inatsisip atortussanngortinneqarnissaa oqaluuserineqassaaq. Tamanna naalagaaffimmi oqartussaasut pisortat ingerlatsinerat pillugu paasitinneqarsinnaatitaaneq pillugu danskit inatsisaanni atuuttumi malittarisassat malillugit sulianik taakkunani suliarineqartunut imaluunniit suliarineqarsimasunut suliarinnissinnaalernissaannut tunngavissiissaaq.
Tamatuma kingunerisaanik danskit oqartussaasuisa, soorlu politiit, naalagaaffiup sinniisaata aamma eqqartuussiveqarfiup pissaanerminnik qanoq aqutsinerat pillugu paasitinneqarsinnaatitaaneq siunissami ajornarnerulersinnaavoq.
Tamannalu Transparency Greenlandip siulittaasuata Anita Hofferip isumakulunnartoqartippaa, tusagassiortut innuttaasullu qanoq aqutsisoqarneranik paasitinneqarsinnaatitaanerat ajornarnerulissasoq ernumagigamiuk, Atugagdliutini ullumi saqqummersuni taama oqarpoq.
Siunnersuuteqartulli, Kim Kielsenip, erseqqissaatigaa pisortat ingerlatsinerat pillugu paasitinneqarsinnaatitaaneq pillugu inatsit nutaaq kalaallit oqartussaasuinut atuutsinneqassanngitsoq.
