Inatsisartuni ullormut pisussat
Qinersisarnermut inatsimmi maannamut atuuttumi Ivittuut kommuniusimasumut sinniisussamik kommmunalbestyrelsimut sumiiffimmi qinersisoqartarnissaa qulakkeerneqarsimavoq.
Ivittuunili innuttaasut ullumikkut ikitsuaraanerannut tunngatillugu, sinniisuutitaqarnissaaq "tamat oqartussaanerannut tunngatillugu inatsisitigut qulakkeerneqarsimanera" pisariaaruppoq, siunnersuuteqartoq, Inatsisartut siulittaasuat, tunngavilersuutimini taama allappoq.
Immikkoortut aappaattut akileraaruserinermik ingerlatsinermut tunngassuteqarpoq.
Tamatumani ilaatigut akileraartartut aningaaserivimmi kontumik normuanik akileraartarnermut aqutsisoqarfimmut tunniussisarnissaat pineqarpoq, akileraarutinut akiliutit amerlanaarutaat checkinngorlugit tunniunneqartarunnaassammata.
Aamma inatsimmut nutaamut Sulisitsisut peqatigiiffiata kukkunersiuinermillu suliaqartut kissaataat ilanngunneqarsimavoq, tassalu suliffeqarfiit nammineerluni nalunaarsuinissamut piffissarititaasumik kinguartitsisinnaanngussapput, nammineerluni nalunaarsukkat elektroniskiusumik nassiunneqarnissaat tamatumunnga piumasaqaatigineqassalluni.
Immikkoortut kingullersaat tassaavoq aalisarneq pillugu Inatsisartut inatsisaata allanngortinnera pillugu Inatsisartut inatsisaata siullermeerneqarnera.
Aalisarsinnaanermut akuersissutinik tunniussisarnerup kommunalbestyrelsinut nuunneqarnissaa pillugu aalajangersakkamik eqqussineq tamatumani pineqarpoq.
Sulianik ingerlatsinerup innuttaasunut qanillisinneqarnissaa Naalakkersuisut siunertaraat, pisortallu ingerlatsinerannik pisariillisaanertut, tamatumalu malitsigisaanik pisortat aningaasartuutaannik ikilisaanertut isigalugu.