Inatsisartuni ullormut pisussat

Namminersorlutik Oqartussat tikeraat ornittagaannik takornariartitsivinnillu pilersitsinissaannik ingerlatsinissaannillu siunnersuut Inatsisartuni partiit oqaluuserissavaat. Pisortat ingerlataannik tikeraat ornittagaqalernerisigut takornariaqarnerup nukittorsarnissaa inuussutissarsiutitullu pingaarutilittut inissisimalernissaa Naalakkersuisunit aqqutissiuunniarneqarpoq.

Tusagassiorfinnut tapiissuteqartarnermi malittarisassat Inatsisartunit aalajangersarneqarnissaannik siunnersuut aamma oqaluuserineqassaaq. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen naapertorlugu, taamatut aaqqiisoqarneratigut malittarisassat sukkut tamaana allanngortinneqartannginnissaat qulakkeerneqassaaq. Tapiissutilli allanngortinneqaratik siuliniutinut tapiissutaaginnarlutillu tunisassiornermut tapiissutaaginnassapput.

Sisamanngornermi immikkoortut pingajuattut aningaasarsianit akileraarutit pillugit inatsisip allanngortinneqarnissaanut tunngassuteqarpoq. Naalakkersuisut naapertorlugit allannguutiginiarneqartut soraarnerussutisiaqartarnermut tunngatillugu aningaaseriviit unammilleqatigiinnerannut pitsanngorsaataassapput. Siunnersuutigineqartoq soraarnerussutisiaqarnissamut aaqqissuussinermut pinngitsoorani ilaanissamik inatsisissatut siunnersuummut atatillugu isigineqassaaq.