Inatsisartuni ullormut pisussat
Tamatuma kingorna soraarnerussutisiaqarnissamut aaqqissuussinermut pinngitsoorani ilaanissaq pillugu Naalakkersuisunit inatsisissatut siunnersuutigineqartoq oqaluuserineqassaaq. Aningaasaqarnermut aatsitassanullu naalakkersuisup Randi V. Evaldsenip inatsisissatut siunnersuut amerlanerusut utoqqalinissaminnut ileqqaagaqarnissaannik imaqartoq saqqummiutissavaa.
Nunanut avannarlernut allanut naleqqiulluta soraarnerussutisiaqarnissamut ileqqaakkavut nalinginnaasumik appasippallaartut, naalakkersuisoq tunngavilersuutimini taama allappoq. Utoqqaat amerliartussammata maanna iliuuseqartoqariaqarpoq, Randi V. Evaldsen taama erseqqissaavoq.
18-ileereersimasut Nunatsinnilu tamakkiisumik akileraartussaasut, ukiumullu 100.000 koruunit sinnerlugit isertitaqartut tamarmik soraarnerussutisiaqarnissamut aaqqissuussamut akiliuteqartarnissaat inatsisissatut siunnersuummi siunnersuutigineqarpoq.
Ullormut oqaluuserisassani immikkoortup tullia kingullerlu aamma inatsisissatut siunnersuutaavoq. Suliffeqarfiit tamarluinnaasa Qitiusumik Suliffeqarfinnik Nalunaarsuiffimmut siunissami nalunaarsorneqartalissapput, tamatumalu peqatigisaanik Inuussutissarsiummik ingerlataqartunik nalunaarsuiffik atorunnaarsinneqassaaq.
