Inatsisartuni ullormut pisussat
Naalakkersuisup Randi Vestergaard Evaldsenip tassani oqaatigaa aningaasaqarnermi ukiuni pingasuni kinguariartorneqareersoq akit allanngoriartornerat ilorraap tungaanut saassimasoq. Aamma Aningaasaqarnermut Siunnersuisoqatigiit missiliuutigisaannut naleqqiullugu 2016-imi siuariartorneq annertunerusinnaasoq oqaatigaa.
Inuit Ataqatigiit aalajangiiffigisassatut siunnersuuteqarlutik Nunatsinni aatsitassat uranimik akullit aamma qinngornernik ulorianartunik akullit allat piiarneqalissagaluarpata aatsitassat sinnikuinik Nunatsinni eqqaaveqartitsisoqarsinnaanerata inerteqqutaalersinnissaa Naalakkersuisunut suliniutigeqquaat.
Ilinniagaqarnersiutit allannguuteqartinnissaannik aamma Nunatsinni inatsisilerinermut kandidatinngorniarfimmik pilersitsisoqarsinnaanera Inatsisartut aamma oqaluuserissavaat.
Ilagiit sinniisaannut qinikkatut sulinerup allatulli qinigaaffittut atuutilersinnissaa, taamaaliornikkullu akissarsiaqarluni sulininngortinnissaa, Partii Naleqqamit siunnersuutigineqarpoq.
Ilinniartitaanermulli, kultureqarnermullu, Ilisimatusarnermut Ilageeqarnermullu naalakkersuisup Nivi Olsenip siunnersuut itigartippaa, Nunatsinni ilagiit sinniisaannut ilaasortat 275-iusut akissarsiaqartinneqassappata tamanna inuiaqatigiinnut ukiumut 11 millionit koruuninik aningaasartuutaanissaa innersuussutigalugu.