Inatsisartuni ullormut pisussat
Soqutigisallit arlallit malittarisassat nutaat pissutigalugit innuttaasut Danmarkimi soraarnerussutisiaqarnissamut aningaasaateqarfinnut akiliuteqartartut Danmarkimut nuunnermikkut marloriaammik akileraarusigaanissaat ernumagalugu oqaatigisimavaat.
Aningaasaqarnermulli naalakkersuisup Randi Vestergaard Evaldsenip siunnersuutip suliarineqarnerani taama ernumassuteqartoqarnera tunngavissaqannginnerarpaa.
Innuttaasut amerliartuinnartut Nunatsinnit nuuttarnerinut suut pissutaanersut, taamatullu ingerlasoqarnerata qanoq-iliorluni allanngortinneqarsinnaanera aamma oqaluuserineqassaaq.
Tamanna pereerpat, erngup nukinganik pilersuineq aamma ujaqqanik pinnersaasiassanik katersineq Inatsisartut oqaluuserissavaat.
Aammattaaq immikkoortut pingasut aappassaaneerneqassapput, tassalu kulturikkut ingerlatsineq sunngiffimmilu sammisassaqartitsineq pillugu inatsisissaq, timersorneq timigassarnerlu pillugit inatsisissaq kiisalu eqqumiitsuliornermik ingerlatsineq pillugu inatsit.