Inatsisartuni ullormut pisussat
Taamaalereerpat immikkoortut oqaluuserisassatut pilersaarutigineqartut katillutik 13-iupput, taakkunannga immikkoortut sisamat uranimik nioqqutissiortoqarsinnaanissaanut atatillugu Naalakkersuisut oqaluuserisassatut siunnersuutaat ataatsimoorullugit oqaluuserineqassallutik.
Inatsisartunut qinersisarneq pillugu inatsimmut Anthon Frederiksenip, Partii Naleqqameersup, siunnersuutaa aamma oqaluuserineqassaaq. Avanersuup Ittoqqortoormiillu immikkut qinersiveqalernissaat Anthon Frederiksenip siunnersuutigaa.
Nunatta nunatut nunarsuarmioqataasutut qanoq inissisimanera qanorlu nunani allani nunallu tamalaat akornanni sorsunnerit pisullu allat peqqutigalugit inuttut ajunaarnersuartoqartillugu Nunatta qanoq pisarnissaa pillugu Inuit Ataqatigiit siulittaasuata Sara Olsvigip siunnersuutaa Inatsisartut aamma oqaluuserissavaat.
Meeqqani inuusuttunilu hashimik imigassamillu atornerluinerup qanoq pitsaanerpaamik pinaveersimatinnissaanut akiornissaanullu oqallisissiaq Peqqissutsimut naalakkersuisup Doris Jakobsenip Inatsisartut ullumi ataatsimiinnerisa naajartulernerani pilersaarutit naapertorlugit taava saqqummiutissavaa.