Inatsisartuni ullormut pisussat

Inissianik attartortitsisarneq pillugu Inatsisartut peqqussutaata allanngortinneqarnissaa, Partii Naleraq sinnerlugu Inatsisartunut ilaasortap Anthon Frederiksenip siunnersuutaa taakkununnga ilaavoq. Tassa atorfimmut atatillugu inigisap sivikinnerpaamik ukiuni tallimani attartoreerneratigut attartortup naliginnaasumik attartukkatut inigilersinnaaqqullugu Anthon Frederiksenip siunnersuutaa oqaluuserineqassammat.

Mimi Karlsenip, Inuit Ataqatigiinneersup, oqaatsitta atugaanerisa nukittorsarneqarnissaannut siunnersuutai marluk aamma oqaluuserineqassapput, soorlu aamma Partii Naleqqap siulittaasuata Hans Enoksenip siunnersuutaa oqallisigineqassasoq.

Meeqqammi peqqissumik imaqarluartumillu inerikkiartornissaannut, atualernissamut piareersimanissaannut nalinginnaasumillu perorsarsimassusaannut iluaqutaasussamik nunatsinni meeqqanut suli atualinngitsunut perorsaanikkut inerikkiartuutaasumik ilaqutariit meerartallit nuna tamakkerlugu atuinissamut piarerfissaqalernissaat qanoq qulakkeerneqarsinnaanersoq pillugu apeqquteqaat aallaavigalugu oqallisissiatut siunnersuut Hans Enoksenip saqqummiutissavaa.

Inuit Ataqatigiit sinnerlugit Inatsisartunut ilaasortat Agathe Fontainip Sara Olsvigillu siunnersuutaat aamma oqallisigineqartussatut pilersaarutigineqarput, oqallisissiatut siunnersuutit eqqartorneqassallutik.