Inatsisartuni ullormut pisussat
Apeqqarissaarneq naammassineqarpat, siunnersuutit sisamat, illuatungiliuttunit aamma attaaviitsumit siunnersuutigineqartut siullermeersumik oqaluuserineqassapput.
Siunnersuutigineqartut marluk Anthon Frederiksenip Partii Naleqqamersup siunnersuutai oqaluuserineqassapput.
Atorfimmut atatillugu inigisap sivikinnerpaamik ukiuni tallimani najugaqarfigineqareerneratigut attartortup nalinginnaasumik attartukkatut inigilernissaa siunnersuutigineqarpoq, maannakkut ukiut arfineq marluk atorfimmut atatillugu inissiani najugaqarsimagunik, najugaq inissiatut nalinginnaasumik attartortittakkatut tigusinnaavaat.
Anthon Frederiksenip siunnersuutaata aappaa tassaavoq inatsisartunut qinersisarnerup maannakkut atuuttup atorunnaarsinneqarneratigut Avanersuup Ittoqqortormiillu tamarmik immikkut qinersiveqalernissaat siunnersuutigaa.
- Qinersisarnermut inatsit 1998-imi allanngortinneqarmat taamanikkulli Avanersuarmiut aamma Ittoqqortoormiit inatsisartuni siniisuutitaqarniarnerat ajornartorujussuanngorpoq, siunnersuuteqartoq taama tunngavilersuivoq.
Mimi Karlsenip Inuit Ataqatigiinneersup siunnersuutaa, tassalu innuttaasut inuunermut ulorianaateqarsinnaasunik nappaateqartunut ilaqutaasut Danmarkimi napparsimasut angerlarsimaffianni akeqanngitsumik 2017-imiit najugaqarsinnaanissaannut naalakkersuisut aqqutissiuussinissaannik siunnersuut, inatsisartut ataatsimiinneranni siullermeersumik oqaluuserineqassaaq.
Inatsisartut ataatsimiinnerani oqaluuserineqartussaq kingulleq Attaviitsumit Naaja Nathanielsenimit siunnersuutaaavoq.
Meeqqat atuarfianni atuartut akulliit immikkut ittumik siunnersorneqarnissaat ilinniaqqiffissanut assigiinngitsunut periarfissanik ilimasaat annertunerulernissaannik siunertaqartoq.