Inatsisartuni ullormut pisussat
Erngup puiaasamiittup imigassallu koffeinimik akullit akitsuutaat pillugu Inatsisartut inatsisaata allanngortinneqarnissaanik siunnersuut oqaluuserineqassaaq. Aamma mamakujuttunut, qummoroortartunut sunoorsinullu akitsuutit oqaluuserineqassapput.
Akitsuutit taakku Inatsisartut ukiakkut ataatsimiinneranni aggustip qaammataanit kingumoortumik atuuttussanngorlugit novembarip qaammataani akuersissutigineqarput.
Kingumoortumik atuutilersumik akitsuutinik qaffaaneq illuatungiliuttunit inuussutissarsiutinillu ingerlataqartunit sakkortuumik isornartorsiorneqarpoq, Naalakkersuisullu kukkusumik toqqammaveqarluni akuersissuteqartoqarsimasoq kingorna nassuerutigaat.
Tamanna tunngavigalugu inuussutissarsiutinik ingerlatallit piffissamit aggustip 20-anit novembarip 23-ata tungaanut akitsuutinik kukkusumik toqqammaveqartumik akiliutigisimasaat Naalakkersuisut utertittussanngorpaat.
Tamannalu pissaaq pisiniarfiit ilaasa akitsuutinut qaffaatit atuisartunit akilerneqartussanngorlugit nioqqutissaatiminnik akitsuisimagaluarpataluunniit.
Inatsisissatut siunnersuutip kinguneranik, suliffeqarfiit ilaat taarsiivigivallaarneqarsimappata, Naalakkersuisut naatsorsuutigaat, suliffeqarfiit utertitsiffigineqarnertik akit appasissut aqqutigalugit pisiniartartuminnut iluaqutinngortissagaat.
Akitsuutinut akiliutaasimasut utertinneqartussat inatsimmi oqaasertaliussat naapertorlugit 8 millionit koruunit missaanniipput.
Aningaasallu akiliutigineqarsimasut utertinneqarnissaat akileraartarnermut oqartussaasunut suliassanngortinneqassaaq.