Inatsisartuni ullormut pisussat
Aningaasaqarnermut Aatsitassanullu Naalakkersuisoq Andreas Uldum aqqanermiit ulloqeqqata tungaanut apeqquteqarfigineqarsinnaassaaq, nalinginnaasumillu ataatsimiinneq nalunaaqutaq ataatsimut nanginneqassalluni.
Aningaasaqarnikkut ingerlatsineq pillugu nalunaarut 2015-imoortoq ippassaq ataatsimiinnermi taamaallaat oqaluuserineqarpoq, oqaluuserineqartussatut naatsorsuussat immikkoortut allat ullumikkumut kinguartinneqarlutik.
Immikkoortut taakku ullumikkut ataatsimiinnissamut oqaluuserineqartussatut naatsorsuutigineqartut kingorna oqaluuserineqassapput.
Imarsiornerup isumannaatsuunissaa pillugu inatsit
Imaanut aqqartartutut suliaqarneq, ilisimasortallu pillugit inatsisip ilaata Kalaallit Nunaannut atortuulersinneqarnissaanik Inatsisartut aalajangiinissaannik immikkoortortaq ilaatigut oqaluuserineqassapput, soorlu aamma imarsiornerup isumannaatsuunissaa pillugu inatsimmut allannguutissatut siunnersuutit oqaluuserineqartussatut pilersaarutigineqartut.
Aatsitassat pillugit ingerlatallu tamatumunnga pingaarutillit pillugit inatsimmut allannguutissatut siunnersuutit taava oqaluuserineqassapput, soorlu aamma gassileriviit, gassinut atortut aamma akuersissuteqarnissamut piumasaqaatit pillugit inatsit eqqartorneqarumaartoq.
Kullorsuarmi timersortarfeqalernissamut siunnersuut
Taava taamaalereerpat 2016-imi akileraarutitigut ilanngaatissat ilaalu ilanngullugit Inatsisartut aalajangiinissaat tullinnguutissaaq, ippassarlu oqaluuserineqartussaagaluit, assersuutigalugu Kullorsuarmi timersortarfeqalernissamut Naalakkersuisut 25 millionit koruuninik immikkoortitsinissaannut Partii Naleqqap siulittaasuata Hans Enoksenip siunnersuutaa ilaatigut oqaluuserineqassasoq.
