Inatsisartuni ullormut pisussat
Immikkoortoq siulleq tassaavoq Naalakkersuisut siulittaasuata atuuffiit inuussutissarsiutilluunniit sorliit ingerlatiinnarsinnaanerinut tunngatillugu inatsimmi danskisut kalaallisullu oqaasertaliussat naqinneqarnissaata pingajussaaneerneqarnissaa. Naqqiissuteqarnermi naapertuutinngitsoqarnera iluarsineqassaaq.
Immikkoortut aappaattut qinngornerit ioninngortitsisartut pillugit aamma qinngornernut illersuuteqarnissaq pillugu Inatsisartut Inatsisaattut siunnersuut aappassaaneerneqassaaq. Siunnersuut pineqartoq assortuussutaavoq, siullermeerneqarneranimi siunnersuutip uranisiornermut attuumassuteqarsinnaanera oqallisigineqartupilussuummat.
Isumaqatigiinngissutigineqarnera ataatsimiititaliami iluarsineqanngilaq, amerlanerussuteqartulli siunnersuutip akuersissutigineqarnissaa kissaatigaat.
Immikkoortut pingajuattut nunaqavissut tikisitallu akornanni Namminersorlutik Oqartussani, Namminersorlutik Oqartussat suliffeqarfiutaanni kommuninilu sulisut qanoq agguatarsimanersut pillugu kisitsisinngorlugu paasissutissamik Naalakkersuisut saqqummiusseqqullugit peqquneqarnissaannik Inatsisartut aalajangiiffigisassaatut siunnersuut aappassaaneerneqassaaq. Siunnersuut partiinit tamanit taperserneqarpoq upernaakkullu ataatsimiinnermi saqqummiunneqassalluni.
Siumumeersup Nikolaj Jeremiassenip siunnersuutai marluk ullumikkut aappassaaneerneqassapput - siulleq tassaavoq sumiiffinni aalajangersimasuni qalorsuarsorluni aalisarnerup inerteqqutaalernissaanik periarfissaqarnissaa, sumiiffinni pineqartuni raajaqassutsip siuarsarneqarnissaa siunertaralugu siunnersuut.
Aammattaaq aalisarnermik piniarnermillu inuussutissarsiutillit inuussutissarsiornerannik siuarsaanermut inatsisip (ESU) allanngortinneqarsinnaanera misissortikkusuppaa, taamaaliornikkut siunissami inussutissarsiutigalugu umiatsiaaqqap pissarsiarinerata nalingata 60 procentianik inuussutissarsiornermi siuarsaanissaq pillugu taarsigassarsiisoqarsinnaanngorlugu.
Nunatta avataanut angalasut nioqqutissanik aningaasanillu nassataannik akitsuuserisut akileraaruserisullu misissuisarnerisa annertusarneqarnissaanik siunnersuut ualeru aappassaaneerneqassaaq. Tamanna ilaatigut timmisartuutileqatigiiffiit ilaasui pillugit paasissutissat atortutigut elektroniskiusutigut takuneqarsinnaalernerisigut akitsuuserisullu inunnik scannerillutik misissuisalernerisigut pissaaq. Taamatut aaqqiissuteqarneq ikiaroornartunik eqqussuinerup akiorniarneqarneranik siunertaqarpoq.
Inatsisartuni ulloq ataatsimiiffiusoq naggerserlugu apeqquteqaat aallaavigalugu oqallinnerit pingasut ingerlanneqassapput. Royal Greenlandip tunisassiorfinnik tunisigaangami unammillinnginnissamik pituttuisumik piumasaqaatitalinnik isumaqatigiissuteqartarnera aammalu Nunatta mingiunnerulernissaa kiisalu Nunatta pissarititai atorlugit sanaartornermut atortussiornermi tunisassiornissamik aallarnisaaniartut qanoq iliorluni tapersersorsinnaanissaat oqallisigineqassapput.
