Inatsisartuni ullormut pisussat
Nunat pingasut inatsisartuinut kaammattuutigineqarpoq suleqatigiissitamik pilersitseqqullugit, taassumalu suliassarissagaa nunat pineqartut pingasut killeqanngitsumik niueqatigiinnissamik isumaqatigiissuteqassappata nunanilu avannarlerni killerni niuernermut siunnersuisoqatigiinnik pilersitsisoqassappat ataatsimut pissarsiarineqarsinnaasut nalunaarsornissaat.
Nunat Avannarliit Killiit Siunnersuisoqatigiiffianit aamma kaammattuutigineqarpoq Nunat avannarliit killiit aalisarnerup iluani naalakkersuinikkut suleqatigiinneq nukittorsaqqullugu Nunat avannarliit killiit aalisagaqarfissuunerata iluaqutissartaata atorluarneratigut. Aalisarnerup iluani suleqatigiinnerup qanoq iliorluni annertusarneqarsinnaanera qulaajaqqullugu nunani taakkunani pingasuni naalakkersuisunut inassutigineqarpoq misissuinerullu inernerinik ataatsimut Nunat Avannarliit Killiit Siunnersuisoqatigiiffiannut nassuiaateqarlutik.
Taakkuli oqaluuserineqarnissaat sioqqullugu Nunatsinni inuk pillugu paasissutissanut inatsisip nutarterneqarnissaa pillugu immikkoortoq oqaluuserineqassaaq. Ullumikkut nunatsinni pissutsinut naleqquttumik aaqqiisoqassaaq, innuttaasut pisinnaatitaaffii qitiutillugit.
Ullormullu oqaluuserisassani immikkoortut kingulliit pingasut tunngaviusumik inatsisissamik piareersaasussamik isumalioqatigiissitaliornissamut tunngassuteqarput. Siumup, Inuit Ataqatigiit Partii Naleqqallu tunngaviusumik inatsimmik piareersaanermik suliap kingusinnerpaamik 2016-imi ukiakkut aallartisarneqarnissaa kissaatigaat.
