Inatsisartuni tallimanngornermi pisussat
Atuarfik pillugu Inatsisartut inatsisaanut allannguutissat arlallit aallarniutigineqassapput.
Siunnersuut 2016-imi novembarip qaammataani workshoppertitsisoqarnera tunngavigalugu suliarineqarpoq. Meeqqat atuarfianut tunngatillugu aaqqiissuusseqinnissaq annertooq tamatumani oqaluuserineqarpoq, workshoppimili inerniliineq naapertorlugu taamatut aaqqissuusseqinnissaq piffissamik sivisunerusumik pisariaqartitsiffiussaaq.
Taamaammat allannguutissatut siunnersuutigineqartut allannguutaassapput piaartumik aaqqikkusunneqartut. Taakku ilagaat "oqaluttuarisaaneq” inuiaqatigiilerinermit atuartitsissutitut immikkoortutut avissaartinneqarnissaa.
Meeqqat atuarfianni nipilersornermik ilinniartitsisarnerit nukittorsarnissaannut aamma allannguutissanik siunnersuuteqartoqarpoq.
Ullormut oqaluuserisassani immikkoortut aappaat nunaqarfinni aqutsisunut kommunalbestyrelsinullu tunngavoq. Nunaqarfinni aqutsisut nukittorsaavigineqarnissaat kissaatigineqarpoq, aamma kommunit kattuffiata KANUKOKA-p inissisimanerata allanngorneranut atatillugu aalajangersakkat arlallit misissorneqarnissaat siunnersuutigineqarpoq.
Immikkoortut pingajuat ineqarnermut tapiissutit allanngortinneqarnissaannut tunngavoq. Ilaqutariit ilaqutariinni toqusoqarneranut imaluunniit allatigut sakkortuumik aqqusaagaqarnerannut atatillugu ikiorniarlugit, ilaqutariit tamatuma kingorna ineqarnermut tapiissutinik qaammatini 24-ni pissarsisarsinnaanissaat qulakkeerniarneqarpoq.
Oqaluuserisassani immikkoortut kingulleq pisortat inissiaataannik attartortittakkanik inissiatut imaluunniit illutut nammineq pigisatut tigusisarnermut tunngassuteqarpoq.
