Inatsisartuni sisamanngornermi pisussat
Aalisarnermullu inatsisip, oqallisaaqisup, siullermeerneqarnissaa pilersaarutaavoq, ullumilu ataatsimiinneq naggaserlugu oqaluuserineqassalluni.
Soraanerussutisiaqalernissamut aningaasaatit ilaannit pissarsiat akileraaruserneqartarnerat pillugu inatsit, pigisanillu pissarsiat ilaasa akileraaruserneqartarnerat pillugu inatsit Inatsisartut pingajussaaneerlugu oqaluuserissavaat.
Eqqumiitsuliornermut piorsarsimassutsimullu 2014-imi periusissiornerup nanginneqarnissaanik Naalakkersuisut peqquneqarnissaannik aalajangiiffigisassatut siunnersuut Inatsisartut aamma oqaluuserissavaat, ullumilu aappassaaneerneqassalluni.
Paasissutissat Inatsisartut ataatsiimiinnerannut tunngasut sukumiinerusut Inatsisartut.gl-imut isernikkut pissarsiarineqarsinnaapput, ataatsimiinnerallu ullaap tungaani nalunaaqutaq aqqanermit toqqaannartumik malinnaavigineqarsinnaassaaq.