Inatsisartuni sisamanngornermi pisussat
Siunnersuutigineqartut imaani avatangiisinut inatsimmi malittarisassat nunani tamalaani inatsisinut atuuttunut naapertuuttunngortinnissaannik siunertaqarput, aammalu pitsaaliuinissamut saliinissamullu suliniutissanik assigiinngitsorpassuarnik imaqarlutik.
Tamanna pereerpat, oqaatsinut tunngasut oqaluuserineqassapput. Naalakkersuisut Oqaasiliortut pillugit Inatsisartut inatsisaat pillugu siunnersuuteqarput, taannalu allattaatsimut oqaatsillu nutaat qanoq iliorluni kalaallisut oqaatsitsinnut ilaalertinnissaannut tunngassuteqarpoq.
Aamma Demokraatit imigassanik kimittuunik kimikitsunillu aalakoornartortalinnik nioqquteqartarnerup sivitsorneqarnissaanik siunnersuutaat ullumi oqaluuserineqassaaq.
Ullormut oqaluuserisassani immikkoortut katillugit aqqaneq-marluupput.
Taakkunanngalu marluk pingajussaaneerneqartussaapput: Tassaallutik Aningaasaqarnermut akileraartarnermullu ataatsimiititaliaq siumoortumik akuersiseqqaarnagu 1,9 milliardit koruuninik Naalakkersuisut nunanit allanit taarsigassarsiniaqqusaajunnaarnissaat aamma avaleraasartuunut akitsuutip appartinneqarnissaa.
Pingajussaaneerneqartullu akuersissutigineqartussatut isikkoqarput.
