Inatsisartuni pingasunngornermi pisussat
Taamaalereerpat Inatsisartut ullormut oqaluuserisassaat pilersaarutit naapertorlugit katillutik qulingiluaapput, taakkunannga arfineq-marluk aappassaaneerinnerussallutik.
Qarasaasiakkut akiliisitsisarnerup aqunneqarneranut inatsit siulliullugu oqaluuserineqassaaq, soorlu aamma innuttaasut kigutilerisumut qarasaasiakkut toqqaannartumik inniminniisalernissaannut periutsimik Naalakkersuisut ineriartortitsillutillu pilersitsinissaannut siunnersuut oqaluuserineqassasoq.
Nalunaarasuartaatitigut atassuteqarneq, nalunaarasuartaatitigullu kiffartuussinerit pillugit inatsit aamma oqaluuserineqassaaq, tunngaviusumillu inatsisimmut, tassunga ilanngullugu isumaqatigiissusiortarnermut sinaakkutissat, allannguutissaat oqaluuserineqassallutik.
Soraarnerussutisiaqalernissamut aningaasaatit ilaannit pissarsiat akileraaruserneqartarnerat aamma eqqartorneqassaaq, pinerluffigineqarsimasunillu ikiuisarnermi siunnersuisarnermik pilersitsisoqarnissaa pillugu apeqquteqaat aallaavigalugu oqallinnissamik siunnersuut aamma oqaluuserineqassalluni.
Inatsisartut ullormut oqaluuserisassaannut paasissutissat naalakkersuisut nittartagaanni takuneqarsinnaapput, Inatsisartullu ataatsimiinnerat KNR-ikkut toqqaannartumik aamma malinnaavigineqarsinnaallutik.