Inatsisartuni pingasunngornermi pisussat
Tamanna pereerpat Inatsisartut ullormut oqaluuserisassani immikkoortut pingasut oqaluuserissavaat.
Demokraatineersup Randi Vestergaard Evaldsenip immuup sukkuanik sapigaqarnerup annertussusianik misissueqqullugit Naalakkersuisut peqquai. Nunatsinni innuttaasut amerlasuut immuup sukkuanik arrortitsisinnaanngitsuupput.
Immuup sukkuanik arrortitsisinnaannginnermik innuttaasuni misissuititsinissaq peqqissutsimut naalakkersuisup Agathe Fontainip itigartippaa, peqqinnissarlu pillugu nittartagaq peqqik.gl innersuussutigalugu, immuup sukkuanik
arrortitsisinnaannginneq pillugu paasissutissat amerlasoorpassuit tassani nassaarineqarsinnaammata, kiisalu aamma pisiniarfiit immuup sukkuanik akoqanngitsunik nioqqutissianik amerlanerusunik ukiuni kingullerni pisiassaateqartalersimammata.
Siumumeersup Jess Svanep Uummannap talittarfiani aserfallatsaaliuisoqarnissaa ujaqqanillu
nunniukkamik malinnut illersuusiortoqarnissaa pillugu aalajangiiffigisassatut siunnersuutaa tulliullugu oqaluuserineqassaaq.
Ullormut oqaluuserisassani immikkoortut kingullersaattut Partii Naleqqameersup Anthon Frederiksenip siunnersuutaa oqaluuserineqassaaq. Kalaallit Nunatta pigisaanik sillimmasiisarfimmik pilersitsinerup iluaqutissartai aammalu aporfissarisinnaasaasa Naalakkersuisunit misissorneqarnissaat taassuma siunnersuutigaa.
Partii Naleraq isumaqarpoq Namminersorlutik Oqartussat sillimmasiisarfittaassagaluarpata aningaasaqarneq iluaquserneqassasoq, aningaasat nunatsinnit aniaannartussaagaluit uninngatiinnarneqarsinnaassammata.
