Inatsisartuni pingasunngornermi pisussat
Peqqissutsimut Nunat Avannarliit Suleqatigiinnerannullu Naalakkersuisoq Agathe Fontain, Inuit Ataqatigiinneersoq, akunnermi ataatsimi apeqquteqarfigineqarsinnaasssaaq.
Taamaalereerpat Inatsisartut oqaluuserisassaat katillugit sisamaapput.
Sullivimmi avatangiisinut allannguutissatut siunnersuut siulliullugu oqaluuserineqassaaq, sullivinni avatangiisinut oqartussaaffik Danmarkimit tiguneqarpat, pineqartup maleruagassaqarnissaa siunnersuummi siunertaavoq.
Piginnaanngorsaaqqinnissamut ikiorsiisarneq pillugu inatsimmut allannguutissatut siunnersuut taava oqaluuserineqassaaq, aningaasarsianillu akileraarutit pillugit inatsit taava eqqartorneqassaaq.
Aktiaatillit taarsigassarsiaasa akileraaruserneqartalernissaat ilaatigut anguniarneqarpoq, Inatsisartullu naggasiutigalugu ullumi oqaluuserisassaat pilersaarutit naapertorlugit tassaavoq Inatsisartut ataatsimiittarfianni ataatsimiinnerit, siumut aalajangerneqareersumik annertussusilimmik, radiukkut aallakaatinneqartarnissaannik KNR-ip pisussaaffilerneqarnissaanik siunnersuut.