Inatsisartuni marlunngornermi pisussat

Inatsisartut ukiakkut ataatsimiinnerat nangillugu ullumi oqaluuserisassat katillugit sisamaapput.

Innuttaasut kigutilerisumut piffissamik qarasaasiakkut toqqaannartumik inniminniisalernissaannut Naalakkersuisut periuutsumik ineriartortitsillutillu pilersitsinissaannut inatsissatut siunnersuut siulliullugu oqaluuserineqassaaq.

Illoqarfinni nunat immikkoortuini qitiusumik napparsimmaveqarfiusuni toqu(-sima-)sut timaannik ikuallaaveqalersinnaaneranik  periarfissanik, aningaasaqarnikkullu pitsaaqutinik pitsaanngequtinillu misissuisussamik Naalakkersuisut peqquneqarnissaat pillugu siunnersuut taava oqaluuserineqassaaq.
Toqusimasullu timaannik ikuallaasalersinnaanermut periarfissaqalerneq innuttaasunit tapersersorneqarnersoq aamma misissuiffigineqassasoq siunnersuutigineqarpoq.

Tunngaviusumik inatsisip - aamma isumaqatigiissusiortarnermut sinaakkutissat Kalaallit Nunaannut atuuttut sinaakkutaasa iluanni pisortat suliassat suliarineqartarnerat pillugu inatsimmut allannguutissatut siunnersuut kingorna taava oqaluuserineqassaaq.

Pisortat ingerlatsiviini nuna tamakkerlugu paasissutissanik katersivimmik pilersitsisoqarsinnaanissaa inatsisitigut matumani periarfissinneqarniarpoq.

Timersortartut nuna tamakkerlugu unammisartut peqataanerisa taakku sulliviinnut ilinniarnerannulluunniit sapinngisamik ajoqutaasinnaasumik kinguneqaqqunagu qanoq iliorluni timersortartut nuna tamakkerlugu atugaat pitsanngorsarneqarsinnaanersut Naalakkersuisut misissussagaat, Nivi Olsenip, Demokraatineersup, siunnersuutigaa, taannalu kingulliullugu ullumi oqaluuserineqassalluni.

Inatsisartut ataatsimiinnerat ullaap tungaa nalunaaqutaq aqqanermut aallartissaaq, ataatsimiinnerlu KNR-ikkut toqqaannartumik malinnaavigineqarsinnaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!