Inatsisartuni inissat 31-t qineqqusaartunit 222-nit pagganneqarput

Qinigassanngortitat amerlassusaat eqqarsaatigigaanni, siuttuunneq Siumut Inuit Ataqatigiillu avippaat. Partiit taakkua marluk tamarmik immikkut 62-inik qinigassanngortitsipput.

Kisianni arnat angutillu naligiinnissaat isiginiaraanni, partiit pineqartut assigiikkunnaarput. Inuit Ataqatigiimmi qinigassanngortitaasa affaat arnaapput, Siumup arnat 15-iniinnaat sassartikkai.

Qinigassanngortittut amerlaneqqusaatsinnerini Atassut tulliuvoq, 40-nik sassartitaqarluni, taakkunannga 13-it arnaallutik. Taava Kattusseqatigiit Partiiat tulliupput, 29-nik qinigassanngortitaqarluni. Taakkua arnartaat tallimaapput. Demokraatit qinigassanngortitaannit 23-iusunit, arnat arfineq pingasuupput. Tassalu Demokraatit Atassutillu qinigassanngortitaasa arnartaat tamarmik immikkut pingajorarterutaapput.

Partiit sassartitsisut arnartaqassusiat qiviarutsigit, Soorlaat Partiiat siuttuuvoq, siulittaasuat arnaasoq kisiartaalluni sassarmat.

Kisimiillutik qinigassanngortittut tallimat, partiit tunuliaqutigalugit qinigassanngortittut naligalugit qinigassanut ilaajumaarput. Eqqaasinnaavarpulli, kisimiillutik qinigassanngortittut akornanni ataaseq arnaammat.

Naalakkersuisut Siulittaasuata naalakkersuisoqarfiata erseqqissarpaa, qinigassanngortittut aqqi saqqummiunneqartut akuerigallagaammata. Tassami ilaat imaaratarsinnaavoq qinersinerup kingorna qinikkatut sulisinnaanngitsutut nalunaarutigineqartut.

Inatsisartunut juunip aappaani qinersilerutta, innuttaasut 40.000 pallillugit qinerseqataasinnaapput.