Immikkut ilisimasalik: Jeremiassen marlunngorpat aalajangiisuussaaq
Issittumi pissutsinik naliliisartoq politikkikkullu siunnersorti, Mikå Mered, taama naliliivoq. Taassuma Kalaallit Nunaanni naalakkersuinikkut ingerlatsineq ukiuni arlalinni malittarisimavaa Tuluit Nunaannilu Londonimi siunnersuisarfittut suliffeqarfimmi Polarisk Groupimi atorfeqarluni.
- Tatiginnikkunnaarnermik marlunngorpat taasititsisoqassappat Kristian Jeremiassenip qanoq-iliornissaa nalornissutigaara, naalakkersuinikkut ingerlatsinermik naliisartoq Mikå Mered taama oqarpoq. Jeremiassenimmi siornatigut oqaatigeerpaa politikkimit tunuarniarluni, aamma Siumumit siunnersuutaasut itigartillugit taasiniarluni ataasiaannarani sioorasaaruteqartarsimavoq.
Siumumi ajornartorsiutaasartoq
Kristian Jeremiassenip naalakkersuinikkut suliaqartuunera maannamut allanngorarfiusimavoq. Atassummit ilaasortaajunnaarluni Siumumut 2009-mi ilaasortanngorpoq. Ilaasortanngornerminiillu Siumumi ajornartorsiutaasarsimalluni. Qanoq-iliornissaa siulittuutigiuminaattuuvoq. Aamma Jeremiassenip Enoksip parteertaavanut Partii Naleqqamut nuunniannginnerminik avammut nalunaaruteqarsimanera Mikå Meredip immikkut maluginiaqquaa.
Karl-Kristian Krusep qanoq aalajangernissaa aamma pissanganarpoq, Jeremiassenili marlunngorpat aalajangiisuussaaq, naliliisartoq tuluit nunaanneersoq taama naliliivoq.
AAMMA ATUARUK Aleqa Hammondimik tatiginnikkunnaarnermik ersersitsisoqarnissaa Kristian Jeremiassenip siulittuutigaa
- Jeremiassen Kukkunersiuinermut ataatsimiititaliami siulittaasuugami "dommeriussaaq". Jeremiassen aamma tassaavoq tatiginnikkunnaarnermik taasititsisoqarnissaanik arfininngormat siulittuuteqartoq.
Mikå Mered, Londonimi siunnersuisarfittut suliffeqarfimmi Polarisk Groupimi naalakkersuinikkut ingerlatsinermik naliliisartoq taama oqarpoq.
Tatiginnikkunnaarnermik taasisoqassagaluarpat, Aleqa Hammondip Atassummit tamakkiisumik taperserneqarnissaa taassuma aamma ilimaginerarpaa.
AAMMA ATUARUK Naalakkersuisooqatigiinni eqqissisaaneq
Immikkulli ilisimasallip Gerhardt Petersen nalornisigilaarpaa. Partiimmi siulittaasorisimasaa kukkuluttortoqaqqissappat Siumumik suleqateqarneq unitsinniarlugu ukioq neriorsuutigaa. Taamatullu neriorsuisimanini eqquutsissaneraa marlunngorpat paasissavarput.