Immap naqqatigut attaviliiniarneq akisugaluartoq iluaqutaasussaavoq

Suliniut nunatsinnut pingaaruteqarluinnaraluarluni, Nuummit Upervimmut attaviliiniarneq 300 millionit koruuneqartoq TELE-POST-imut ajornarsimasoq, pisortaaneq, Kristian Reinert Davidsen oqarpoq. 

- Pilersaarusiaq aallaavigalugu aalajangiisoqartuuppat, taamatut aalajangiisoqartoqarsimassanngikkaluarpoq. Suliffeqarfimmi namminersortuugaluarpat aamma taamatut aalajangiisoqarsimassanngikkaluartoq, pisortaq oqarpoq.

Aamma atuaruk Immap naqqatigut kabeli tallineqartussanngorpoq

TELE-POST-ili Namminersorlutik Oqartussanit 100 %-imik pigineqarpoq, taamaattumik aningaasaqarniarneq pingaarnerunngilaq - immap naqqatigut kabelit atorlugit attaviliiniarnermi imminut akilersinnaalertussaammat. 

- Immap naqqatigut kabelit atorlugit attaviliiniarneq inuiaqatigiinnut iluaqutaasussaammat aalajangiisoqarpoq. 
Innuttaasut pingajorarterutaat immap naqqatigut kabelit atorlugit attaveqarnikkut atuisuupput, tamannalu naammanngilaq, Reinert Davidsen oqarpoq nangillunilu:

- Amerlanerusunik atuisoqartariaqarpoq, taamaattumik tamanna tunuliaqutaralugu inuiaqatigiinnullu pingaaruteqarluinnarmat aalajangiisoqarpoq.

Ammanerulersitsinissaq pillugu unitsinneqassasoq, Inatsisartut aalajangeeqqammerput. Tamannalu Aasiannit Upernavimmut immap naqqatigut kabelit atorlugit radiukkullu atassuteqaateqalernissamut Telep aningaasalersuiniarneranut pingaaruteqarluinnarpoq. 

Telep unammillertoqarnera maanna malugereerpaa, naallu mobiilinut angallattakkanut suli ammanerulersitsisoqanngikkaluartoq, Internettikkut attaveqaatit pitsanngorneratigut Skypekkut atuisoqarnerulersimavoq, nutaamillu immap naqqatigut attaveqaateqalernerisigut tamanna Telemut suliassaqartitsinerulersimalluni.  

- Kalaallit Nunaata annersaanut immap naqqatigut attaveqaasiornissaq iluaqutaasussaavoq, tamannalu Telemut unamillertoqarneruleranik kinguneqartussanngussalluni, TELE-POST-imi pisortaaneq, Kristian Reinert Davidsen KNR-imut taama oqarpoq.