Immap assingi pillugit isumaqatigiissuteqaqqinnissaq sivisunaarukkaat

Danskit naalakkersuisui Namminersorlutillu Oqartussat Nunatsinni immap assingi kinguaattoorutigineqartut pillugit isumaqatigiissutissaq nutaaq ukioq ataaseq sinnerlugu isumaqatigiinniutigaat. Suli paasinarsinngilaq, danskit ministeriat taama ilisimatitsivoq.
aggustip 07-at 2017 13:08
Nutserisoq Simon Uldum -

Namminersorlutik Oqartussat Danmarkimi Geodatastyrelsimut nutaamik isumaqatigiissuteqarnissaat sulissutigineqartoq, sanaartornermut, ineqarnermut attaveqaqatigiinnermullu naalakkersuisuusimasup Knud Kristiansenip 2016-imi juunip qaammataani ilisimatitsissutigaa.

Aqutsisoqarfiup Nunatta kujataanut kitaanullu immap assinginik 73-inik 2018-ip naannginnerani tunniussinissamik isumaqatigiissut naammassisinnaajunnaarlugu ilisimatitsinerata kingorna tamanna pivoq.

AAMMA ATUARUK Namminersorlutik oqartussat nutaamik isumaqatigiissusiortut

Sulili isumaqatigiissuteqartoqarsimarpasinngilaq.

Danskit silap pissusianut nukissiuuteqarnermullu ministeriat, Lars Christian Lilleholt, aviisimut Politikenimut mailikkut allappoq nutaamik isumaqatigiissuteqarnissaq suli isumaqatigiinniutigineqartoq.

- Imarisaa pillugu oqaaseqarsinnaanngilaga, Namminersorlutilli Oqartussat pitsaasumik oqaloqatigineqartut oqaatigisinnaavara. Ilaatigulli Kalaallit Nunaanni imarsiornikkut ineriartornermut ikorfartuutaasussamik siunissami tunniussaqartarnissaq pillugu tapiliussatut suliniutissat pillugit Namminersorlutik Oqartussat oqaloqatigineqarput.

AAMMA ATUARUK Immap assinginik suliaqarnermi Asiaq ikiuukkusuttoq

Naalagaaffiup immap assinginik tunniussinissamik isumaqatigiissutip atuuttup naammassineqarsinnaasimannginneranut Nunatta taarsiissutitut taaneqarsinnaasumik tunineqarsinnaanera Lilleholtip ammaffigaa, qanorpiarli imaqassanersoq oqaaseqarfigerusunngilaa.

Lars Chr. Lilleholt aggustip naanerani Nunatsinnukassasoq danskit nukissiuuteqarnermut, pilersuinermut silallu pissusianut ministereqarfiata aamma ilisimatitsissutigaa.