Agathe Fontain: Imigassaq aalakoornartortalik immuttut inngilaq

Pisiffiup Brugsenillu akitsuinissamik, ilinniartut sulisullu 18-it inorlugit ukiullit ikinnerulernissaannik sioorasaarinerat Agathe Fontainip isumaanik allanngortitsinngitsoq, naalakkersuisup siunnersuutip novembarip ulluisa arfernganni aappaassaaneerneqarnissaa sioqqullugu nalunaarutigaa.

- Maannakkununa uagut politikeriusugut aalajangiusimasussaasugut isummersortussaallutalu, Fontain tusagassiuutinut nalunaaruteqarluni tallimanngormat allappoq.

- Suliassaraarput inuiaqatigiit pitsaasumik inuunissaannut sinaakkusersuinissaq. (...) Uani suliffeqarfinnut imigassamik aalakoornartortalimmik aningaasarsiortunut soqutiginninneq pingaarnerutinnagu, naalakkersuisoq ilaatigut allappoq.

Imigassat aalakoornartortallit takussaannginnerunissaat, tikikkuminaannerunissaat minnerusumillu ussassaarutaanissaat imigassap aalakoornartortallip pitsaaliorneqarnissaanut Naalagaaffiit Peqatigiinnit inassuteqartoq, Fontainip innersuussutigeqqippaa.

Taassuma pisiniarfiit sukkasuumik assersuisinnaanerat nuannaarutigaa.

Meeqqallu imigassaq pillugu inatsisiliorniarnermi pingaartinneqartut, Agathe Fontain allappoq.

- Imigassaq aalakoornartortalik aanngajaarniutaavoq. Immuttut errorsinermullu qaqorsaatitut ulluinnarni pisiassatut inngilaq, Agathe Fontain allappoq.