Imigassap ammasarfii sivitsulerput
Siumut sinnerlugu Inatsisartuni ilaasortaq Malik Berthelsen, siunnersuuteqartuuvoq ullut tamaasa tassa sapaat ilanngullugu unnukkut nalunaaqqutaq qulingiluat tungaanut pisiniarfinni imigassanik nioqquteqartoqarsinnaalernissaanik.
Tamannali ilaqutariinermut ataatsimiisitaliami ilaasortanit oqaluuserineqareerluni, ullui allanngortinneqarput, tassa taamaallaat tallimanngornermi arfininngornermilu unnukkut nalunaaqutaq qulingiluat tungaanut imigissarsiniartoqarsinnaanngortinneqarluni.
- Uggornaraluarpoq siunnersuutiga tamakkiisumik tapersersorneqanngimmat. Kisianni tallimanngornermi arfininngornermilu ammasarfiit sivitsornerat akuerineqarmat naammagisimaarpara ullumi taakku imigassarsiniartut amerlanerusarput, Malik Berthelsen oqarpoq.
Malik Berthelsenip siunnersuuteqarnermut tunngavilersuutaasa ilagaat, timersoreertilluni akunnerulluuniit naanerini ataasinnguarsiniartoqarsinnaanissaa.
Ilaqutariinermut ataatsimiititaliaq susassaqartunik arlalinnik tusarniaavoq, tusarniaanernilu paasisimallugu imigassanik aalakoornartortalinnik tuniniaasarneq sivitsorneqassappat kingunipiloqarsinnaasoq.
Imigassaq Ikiaroornartorlu pillugit Siunnersuisooqatigiit, imigassamik nioqquteqartarnerup sivitsorneqarnissaanut akerliupput. Tassani tunngavilersuutigaat, inuiaqatigiini ajornartorsiutit amerlissasut, soorlu meeqqanik sumiginnaanneq annertunerulernissaanik oqaaseqarlutik. Tamanna aamma politiinit oqariartuutigineqarpoq.
Inuit Ataqatigiit uani aalajangiisinnaasuugunik, maannamut imigassanik sassaalliisarnerit allanngortissanngikkaluarpaat. Tassa ulluinnarni unnukkut arferngup tungaanut, arfininngornernilu ataatsip tungaanut taamaallaat pisiniarfinni imigassat ammasarnerat naammagigaluarpaat.
- Naaperiarfeqarsimanngitsuugutta ikinnerussuteqarsimassagaluarpugut taamaasillutillu amerlanerussuteqartut ataasinngornermiit sapaat ilanngullugu unnukkut qulingiluat tungaanut ammatitsisarnissaq aalajangiussimassagaluarlugu, Olga P. Berthelsen IA-miit oqarpoq.
- Tamanna peqataaffigisinnaanngilarput soorluttaaq politiit aamma imigassaq ikiaroornartorlu pillugit siunnersuisooqatigiit aamma WHO tamatumunnga akerliusut, Olga P. Berthelsen oqarpoq.
Taamaattoq ammasarfiit sivitsornerisigut inuiaqatigiinni ajortorsiutit amerlinissaat Malik Berthelsenip ilimaginngilaa.
- Isumaqarpunga kalaallinut tatiginninnginneruallaartoq oqassalluni meeqqat sumiginnakkat amerliumaartut ammasarfiit nalunaaquttap akunnerinik pingasuinnarnik sivitsorneratigut, siunnersuuteqartoq oqarpoq.
Siunnersuummut 27-it isumaqataapput ataaseq akerliusoq marluk taaseqataanngillat pingasunngornermi ualikkut siunnersuut taasissutigineqarmat. Tamatuma kingorna Naalakkersuisut peqquneqarput imigassat niuertarfinni nioqqutaanerat pillugu inatsisip allannguutissannik saqqummiussinissamut.
