Imigassanut akitsuut Nanoq Beerimit akilerneqarsimanngilaq
Nanoq Beerimi apeqqusernarsinnaasunik suleriaaseqartoqarsimanera maanna paasinarsivoq, tassami ilaatigut Nanoq Beer imermut imigassamullu akitsuutinik Nunatta karsianut akiliisarsimanngitsoq paasinarsimmat.
Suliffeqarfik Kommune Kujallermi borgmesterimit Jørgn Wæver Johansenimit, Inatsisartunilu ilaasortaasimasumit Gerhardt Petersenimit aqunneqaraluarpoq, paarlakaajaallutik pisortaanngikkunik siulersuisuni siulittaasuusarsimagamik.
Allagaatinik paasitinneqarnerup kingorna Akileraartarnermut Qullersaqarfiup maanna uppernarsarpaa, suliffeqarfik Nanoq Beer akitsuutinik nalunaarsuisarsimanngitsoq imaluunniit Inatsisartut inatsisaat naapertorlugu imigassanik aalakoornartortalinnik Nunatsinni pilersinneqarsimasunut akitsuummik, Akileraartarnermut Qullersaqarfimmut akiliuteqartarsimanngitsoq.
Akileraarutinik akiliisarsimannginnerup saniatigut Nanoq Beer immiorfimmut tatiginnillutik aningaasaliisorpassuarminut atukkiisunullu niuernermik ingerlatsinerlussimaqisoq paasinarsivoq. Taakkumi aningaasaliissutaat annaaneqarput. Tassami suliffeqarfik aningaasaataarutivissimavoq.
Immiorfimmi iluanaaruteqarsimasutuaasut tassaapput Jørgen Wæver Johansen aamma Gerhardt Petersen, taakkumi suliffeqarfiup siulittaasuatut pisortaatullu akissarsiaqartinneqarsimagamik.
Atuagagdliutini allaaserisaq naapertorlugu, akiliisinnaajunnaartup pigisaanik isumaginnittup politiinut suliassanngortitsinissaq sulissutigaa, taassumalu suliffeqarfimmi akisussaasuusut pineqartut marluk suliffeqarfimmut akiliisinnaajunnaartumut akisussaatinneqarnissaat neriuutigaa.
