Imernalaaq Festival sapaatit-akunnerata naanerani
Festivalimi nipilersortut qitiussapput, arfininngorpallu KODA-p nunatsinni nipilersortartunut ukiumoortumik nersornaasiuttagai agguaanneqassallutik.
Imernalaaq Festival nipilersoqatigiinnit rockertartunit SIMIK-kunnit 1978-imi pilersinneqartunit ukiuni arlalinni tusarnaartitsisimanngitsunit aqagu unnukkut ammarneqassaaq.
AAMMA ATUARUK Nipilersoqatigiit Simik Imernalaaq Festivalimi aliannaartitsilersut
Nipilersoqataasullu ilaat Inatsisartuuvoq, tassalu SIMIK-mik aallarneeqataasoq Steen Lynge, qatanngutini Frederik aamma Steffen ikinngutitillu peqatigalugit tusarnaartitsissammata.
Tallimanngorpat unnukkut nipilersoqatigiit KATUMA aamma erinarsortartoq nuannarineqarluartoq Kimmernaq saqqummersitaminik 7000-it sinnerlugit tunisaqarsimasoq kuultinnassimasorlu tusarnaartitsissapput.
KODA AWARDS agguaanneqassapput
Arfininngorninngorpat unnukkut KODA AWARDS ingerlanneqassaaq, 2013-imut 2014-imullu nersornaasiisoqassalluni.
Nersornaasinermullu atatillugu nipilersoqatigiit 80-ikkunni nuannarineqarluartut ilaat tudarnaarneqarsinnaapput, tassalu Naneruaq aammalu nutaajunerumaartut KIMIA, eqqumiitsuliortumit tamatigoortumit Mike Fencker Thomsenimit siuttuuffigineqartut. Nipilersoqatigiit nuusiartik siulleq ”Kimia” saqqummerseqqammerpaat.
Nuummiinngikkaannilu oqaluttuarisinnaavarput tallimanngorpat unnukkut Ilulissani aamma tusarnaartitsinissaarsuaqassammat.
Ilulissani aamma tusarnaartitsisoqassaaq
Ilulissat Haliata aaqqissugaanik nipilersoqatigiit pingasut tusarnaartitsissapput, tassalu Aasianneersut Angut Clasen aamma Inneruulat Jam, Nuummeersut G-60 kiisalu Ulf Fleischer Paarisa Band peqatigalugit.
