VIDEO Imartatsinni uuliasiornissaq innuttaasut 75 procentiisa akerliuffigigaat
Innuttaasut akornanni qulartoqarpoq. Imartatsinnimi uuliamik ujaasinissaq innuttaasut amerlanersaasa, tassalu isumasiorneqartut 75 procentiisa, akerliuffigaat.
KNR-illu Qaqortumi naapitaminik tallimanngormat isumasiuinerani kisitsisit allaanerussuteqarpallaanngillat. Aqqusinermi naapitavut isummersortippagut:
- Sikorsuit angumasinnaasaanni uuliasiortoqarnissaa uanga akuerisinnaanngilara. Navianaqaat, aseruerujussuartarput ilulissat sikorsuillu. Taamaammat nalitsinni uuliasiortoqarnissaa akuerisinnaanngilara, soraarnerussutisialik, Isak Davidsen, KNR-imut taama oqarpoq.
Aamma atuaruk Misissuineq: Innuttaasut uuliasiorneq pillugu pitsaanerusumik ilisimatinneqarusupput
- Uulia atorfissaqartipparput, sooq suut tamaasa allaninngaanniit tikisissavagut? Nunatsinni misissuinerit ingerlanneqarniarlik, peqarpat immaqa siunissami tamakkuninnga qalluisoqarsinnaajumaarpoq atorfissaqartinneqarpata, savaatilik Niels Lund taama oqarpoq.
Sikorsuit sarfarlu uuliasiortunit aqunneqarsinnaanngillat
- Uagut tapersersorunnaarnikuuarput takanani sinerissap avataani uuliasiortoqassappat, ulorianarami. Sikorsuit sarfarlu akiorneqarsinnaanngillat uuliasiortunit, aalisartoq Søren Noahsen taama isumaqarpoq.
Uuliamik ujarlernerup issittup pinngortitaata ataqatigiinnera, miluumasut aalisakkallu ulorianartorsiortissagai, Pinngortitaq pillugu nunarsuaq tamakkerlugu suliniaqatigiiffiup WWF-ip Danmarkimi generalsekretæria Gitte Seeberg isumasiuisitsisoqareersoq KNR-imut taama oqarpoq.
Aalisartoq aamma taama isumaqarpoq:
- Qaartiterileraluarunik uumasorparujussuit aalisakkallu toqorarneqassapput. Ulorianarpoq, Søren Noahsen taama oqarpoq.
WWF-ip HS Analyse suleqatigalugu innuttaasunik isumasiuinerani, aalisarfiunngitsuni piniarfiunngitsunilu uuliamik ujaasisoqarnissaa ajoriffissaqartinneqanngilaq.
Aamma atuaruk Greenpeacep legonik issittuliani mingutsitsivigigaa
Uuliamillu nassaartoqariataassagaluarpat nalilersuilluareernikkut aatsaat qalluisoqarsinnaanera kissaatigineqarpoq:
- Maannamut uuliamik nassaavissortoqarnikuunngimmat neriuppunga tulliani misissuisoqarpat nassaartoqarumaartoq. Nassaartoqareerpat immaqa tamanna aalajangiiffigissallugu tulluarnerussaaq, savaatilik Niels Lund taama isumaqarpoq.
Iluliarsuit angisuut imartatsinnut takkuttalersimammata uuliaqarneranik misissuisoqarnissaa aamma tulluartuusorineqanngilaq.
- Soorunami suliffissat perusuppagut, kisianni takanani uuliasiortoqassappat ulorianarpallaassaqaaq, aalisartoq Søren Noahsen taama isumaqarpoq.
Nunatsinni aalisartut piniartullu 9 procentiinnaasa uuliasiortoqarsinnaanera isumaqatigigaat innuttaasut isumaannik misissuinermi aamma paasinarsivoq.
