Imartatsinni saattuaqassuseq pitsanngoriaateqartoq

Nunatta sineriaani saattuaqassuseq ukiuni kingullerni arlalinni ajortumik inissisimariarluni maanna pitsanngoriaateqalaarsimasoq, Pinngortitaleriffimmmi biologinit nalunaarutigineqarpoq.
novembarip 27-at 2015 05:35

- Aqutsiveqarfinni tamangajanni ukiut arlerlugit piisatsisoqareerluni, sumiiffiit ilaanni ukioq manna tamanna illuatungaanut saariarsimarpasippoq. matumani aqutsiveqarfiit Sisimiut aamma Nuuk Paamiullu eqqarsaatigineqarlutik, Pinngortitaleriffimmi ilisimatusartoq, Ann-Dorte Burmeister oqarpoq.

Sisimiut eqqaanni saattuarniarfiusartuni saattuarniarnermit aammalu biologit misissuisarnerinit paasissutissat pissarsiarineqartut takutippaat, pineqartuni peqassuseq 2009-miit 2014-imut appariartuinnavissimasoq. Tamannali ukioq manna tassa illuatungaanut saassimavoq.

Saattuaqassutsip siuariartulaarnera nuannaarutissaagaluartoq taamaattoq biologit inassutigaat, aappaagu pisassat 300 tonsiusut ilaneqassanngitsut. Taamaa innersuussinermi neriuutigineqarluni, ukiuni tulliuttuni saattussat amerliartornerunissaat.

Pinngortitaleriffik aqutsiveqarfinni Nuummi Paamiunilu misissuinermik ingerlataqarsimanngillat, taamaammallu tamaani peqassutsinik paasissutissanik pissarsiffigisamit ataasiinnarmit toqqammaveqarput, tassalu saattuarniartartut nalunaarsuutaannit. Tamaanilu sinerissap qanittuani pisassiissutigineqarsinnaasutut innersuussutigineqarput 200 tonsit, avataanilu aalisartunut 1.000 tonsit pisassiissutigineqarnissaat innersuussutaalluni.

Pinngortitaleriffiup aamma innersuussutigaa, saattuarniartarneq qaammatini marsip naaneraniit juulip qiteqqunneranut aqutsiveqarfinni tamani ingerlanneqartarnissaa, taamaaliornikkut saattuanik qituttunik qalerualinnik avammut eqqaasannginnissaq pinngitsoortinneqarsinnaammat.

Pinngortitaleriffiup siunnersuinera uani atuarneqarsinnaavoq.