Ilulissat: Nammineq piumassutsimik sammisassaqartitsiviliortut
Aasap ingerlanerani timersortarfiup silataani issiaartarfiit ikkussuunneqarput. Maanna sammisassaqartitsiviup atortussai Ilulissanut tikipput upernalerneranilu ikkussorneqarumarlutik.
- Sila qaamanerusalerpat sukuutsertarfik siulliullugu suliarineqassaaq. Aamma Pisiffiup pisiniarfiata silataani sisortarfik suliarissavarput. Aasamut ikkussuunneqartussaq tassaavoq tarzanbane-mik taaneqartartoq, sammisassaqartitsiviliornissamik isumassarsisoq Palle Jeremiassen KNR-mut oqaluttuarpoq, isumassarsiarlu siorna Danmarkimi feeriarnermi takkuppoq.
- Vesterbromi illorsuit akornanni pisorujoorpugut. Taava isaariakkut iseratta takulerparput sammisassaqartitsivissuaq. Meeqqat nuannisartut isiginnaajutaa nuliara oqarfigaara: Soormi illoqarfitsinni taamaattuliorutta?, Palle Jeremiassen oqaluttuarpoq.
Maanna peqatigiiffimmi aqutsisut inuit aqqaneq marluupput ukiullu ingerlanerani aningaasanik pissarsilertorsimapput.
Aningaasat siullit siorna Ilulissat Lions Clubip juullimut niuffatsitsinerani tunniunneqarput checki 100.000 koruuninik aningaasartalik tunniunneqarmat taassumalu qaavatigut Lions Club Danmark 50.000 koruuninik tunniussaqarpoq. Cairn Energy aningaasanik aamma tunniussaqarpoq 100.000 koruuninik tunniussaqarami. Destination Avannaa issiaviit ikkussuunnerannut aamma 35.000 koruuninik tunissuteqarpoq.
Peqatigiiffik arlaleriarluni katersuiniarluni aaqqissuisarpoq unnugulu aamma kulturip illorsuani Sermermiuni aaqqissuiniarput nalunaaqutaq arfineq marluniit qulit tungaannut. Aliikkusersuisoqarlunilu nipilersortoqassaaq. Suliffeqarfiit tunissuteqarniartut scene-mut qaqillutik tunnissuteqartassapput.
- Suliap aallartinneranit angusaqalertoqaagut. Imaassimagunarpoq suliniut soqutigineqaraluartoq aqutsisussamik amigaateqaannarsimasut, Palle Jeremiassen oqarpoq.
Peqatigiiffik upernaaq Pisiffiup tunuani sisorartarfimmi katersuiniartillugu ilimaginngisamik pisoqarpoq.
- Tassaaku ilagiit sinniisaat checkimik 300 koruunimik pajuttut. Oqaluttuuppaatigut utoqqaagamik toqqaannartumik ikiuussinnaanatik taamaattoq suliniummut tapersersuinertik takutinniarlugu tunissuteqariartorlutik unnerput. Misigisat taama ittut assorujussuaq kajumissaataapput, Palle Jeremiassen oqarpoq.
