Ilulissani sanaartorfissat assortuussutaapput

Ilulissani piginneqatigiilluni illuliat illoqarfiup pilersaarusiornerani kollegiat inissaannut inissillugit sananeqaannaratik aamma Namminersornerullutik Oqartussat aqqusinniaannut inissinneqarsimapput.

Piginneqatigiit siorna novembarimi toqqavissamik tunineqaramik nuannaarsimassagaluaqaat, upernaarli marsimi sanasut kommunemit nalunaarfigineqarput sananertik tamakkiisumik unitsissagaat, Perorsaanermik Ilinniarfiup kollegialiassamik sisamat toqqammavissaanni sanasoqarsimammat.

Namminersornerullutik Oqartussani immikkoortortaqarfiup ”Fysisk Planlægning-ip” tassa sanaartukkat inissineqarnerannut suliaqartartup kommune peqqusimavaa, sanaartukkat illoqarfiup pilersaarusiorneranut tulluuttunngorlugit nutaamik titartaaqqullugit, taamaalilluni Piginneqatigiit kollegiassallu sisamat inissaqartilerlugit.

Taamaalilluni suliaq tamakkiisumik inissinnasorinarpoq, taamaanngilarli, tassami Piginneqatigiit Namminersornerullutik Oqartussat aqquserniaannik akiligaannillu atuinnarlutik sanaartornerat aamma ajornartorsiutaammat.

Piginneqatigiit Illuutileqatigiit nammineerlutik akilikkaminnik aqqusinniortussaasimapput, imaluunniit aqquserngup kollegianut atugassatut sanaap atorneranut akiliuteqartariaqarsimagaluarlutik.

Taamaalilluni Piginneqatigiit sanaartornerat ilumut iluamik piareersarneqarsimasutut suli isikkoqanngilaq.