Akunnittarfittaassaq Visit Greenlandimit nuannaarutigineqartoq

Akunnittarfinnili inissat siunissami pisariaqartitsineq naapertorlugu naammanngitsut, Visit Greenlandimi pisortap tullia, Mads Daniel Skifte oqarpoq. 

-  Ilulissani Hoteliliornissaq Visit Greenlandimiit ajoriffissaqartinngilarput,  nalunnginnatsigu aasakkut takornariarusuttut amerlanerugaluarmata, Mads Daniel Skifte taama oqarpoq.

Ilulissani takornariaqarnerpaaffiup nalaani akunnittarfinni inissat ukiuni arlalinni killeqartarsimapput. Takornariarpassuimmi nunani assigiinngitsuneersut avannaanukarusuttarmata.

- Akunnittarfimmi  timmisartunilu  inissat amigaatineqarnerat, aamma  angalatitsiviit takornarianik Ilulissanukartitsiniaraluarnerat inissaqannginneq pissutigalugu taamaatitsiinnartarnerat nalunngilarput, Visit Greenlandimi pisortap tullia, Mads Daniel Skifte oqarpoq.

Inissat siunissami amigaatigineqarsinnaasut

Akunnittarfinni inissat siunissami amerlanerungaartut amigaatigineqalissapput, Ilulissanimi mittarfiup tallineqarnera 2022-imi naammassineqartussaasoq, Mads Daniel Skifte oqarpoq. 

Ilulissani akunnittarfinni unnuisimasut siorna 69.500-iupput. Akunnittarfiliornissarlu aningaasarsiornikkut aamma iluaqutaasinnaasorineqarpoq.

- Taamaammat inissaqarnerulernissaa ajunngiinnassaaq,  taamaalilluni aningaasat kaaviaartinneqartut amerlanerulissammata,  Visit Greenlandimi pisortap tullia Mads Daniel Skifte oqarpoq. 

Ilulissani qatanngutigiit Tommy aamma Frank Bagger, Tankeraaq Apsimik piginnittut akunnittarfittaassamut 50 milliuunit koruuninik aningaasaliiumapput, akunnittarfittaassaq illoqarfiup qeqqani Kâlêraq Poulsenip Aqqutaaniittussaavoq. 

Hotel Ilulissat 2019-imi naammassineqartussatut pilersaarutigineqartoq naammassippat akunnittarfiit tallimassarilissavaat.