Ilulissani akunnittarfiliortoqalerunartoq

Init tamarmik atorneqarput, init tamakkerlugit inniminnerneqareerput. Ilulissani piffissap takornariaqarfiusup nalaani kingullermi tamanna tusarsaavoq.
Akunnittarfiup illutassaata takusassiarineqarnera Assi © : Qaasuitsup Kommunia/Kommuneplantillæg
decembarip 14-at 2017 09:25
Nutserisoq Simon Uldum -

Nunatsinni illoqarfiit takornariarfiusartut pingaarnersaanni takornariarpassuit Ilulissat kangerluat takusassarsiorfigiartorlugu avannaanilu kulturi misigisaqarfigerusullugu tikittartut tamakkerlugit inissaqartinneqanngillat.

Tamannali allanngortinneqartussanngorunarpoq, Ilulissanimi akunnittarfimmik nutaamik quleriinnik tallimanik initaqartumik sanaartortoqassagunarpoq.

Kommunimmi pilersaarutaanut tapiliussaq, illoqarfiup qiterpasissuani akunnittarfiliornissamik periarfissiisoq kommunalbestyrelsip akuersissutigeqqammerpaa.

Ilulissani Kaaleeraq Poulsenip Aqqutaata eqqaani quleriinnik tallimanik initalimmik akunnittarfiliornissaq pilersaarutigineqarpoq.

 

AAMMA ATUARUK Akunnittarfinni unnuisartorpassuusut

 

Takornariallu amerlanerusut tikittalernissaannut periarfissiissagaluartoq, taamatullu aamma aningaasatigut iluanaarutit amerlissagaluartut, akunnittarfiliortoqarniarnera tamanit iluarineqanngilaq.

Kommunimut pilersaarummut tapiliussamut atatillugu sapaatit akunnerini qulini tusarniaasoqarnerani illoqarfimmi innuttaasut ilaat suliniutaasoq akerleralugu nalunaaruteqarsimapput.

Akunnittarfiup portusuup tarraninnissaa isikkivimmillu assersuinissaa innuttaasunit ernumagineqarpoq, tamannalu innuttaasut naapertorlugit illut nalingi akimikkut appariaateqarnerannik kinguneqarsinnaavoq.

Tamatumunnga tunngatillugu kommuni naliliivoq taama pisoqaratarsinnaasoq, taamaattumillu sanatitsisoq taarsiiffigeqqussummik piumaffigineqaratarsinnaasoq.

 

AAMMA ATUARUK Akunnittarfinni unnuisoqarnerusoq