Assi: Bine Berthelsen Brandt

Ilulerit kummiusut nannunut qimaasitsiniutissaqqissut

Piniarnermut Aalisarnermullu Naalakkersuisoqarfik piniarnermut nakkutilliisut ilulernik kummiusunik seqittaatinillu qasilisoornartulinnik nannunut qimaasitsiniutitut atuisinnaalernissaat anguniarlugu sulissuteqarpoq. Siunertaq WWF-imit taperserneqarlunilu akerlilerneqarpoq.

- Nannut inoqarfinnut qanillivallaartut ilulernik kummiusut atorlugit qimaasinneqartalernissaat isumassarsiatsialaavoq. 
Pinngortitaq pillugu nunarsuaq tamakkerlugu suliniaqatigiiffimmi, WWF-imi, uumassusilerisoq, Kaare Winther Hansen taama isumaqarpoq. 

Nanoq inoqarfimmut qanillivallaarsimatilluni toqutaagaangat nannuttassaniit ilanngaatigineqarneq ajorpoq. WWF-illu taamaattoqarnera piujuartitsinissap aqqani pitsaasuunngissoraa. Tassami nannuttassiissutinit amerlanerusunik pisaqartoqartarmat. 

AAMMA ATUARUK Isbjørne spottet nær Nassuttooq

Ilulerit kummiusut seqittaatillu qasilisoornartut piniarnermut nakkutilliisunit misileraatitut atorneqarnissaat naalakkersuisoqarfiup kissaatigaa. Taamaaliorniarunillu Kalaallit Nunaanni Politiinit immikkut ittumik akuersissuteqartariaqassapput. Taakkartorneqartummi Nunatsinni inerteqqutaapput. 

AAMMA ATUARUK Vandrere i Sydgrønland advares mod isbjørne

Ilulerit kummiusut iluaqutaasut

-Ullutsinni aallaammik eqqarnikkut nannut qimaasinniarneqartarput. Qimaasaraluarlutilli uteqqittarput. Kaare Winther Hansen, WWF-imeersoq taama oqarpoq. 

Taassuma oqaluttuaraa, nunani allani ilulerit kummiusut iluaqutigineqartartut. Nunatsinnili aamma atorneqarnissaat isumassarsiatsialaavoq. 

WWF-ip nannunik alapernaarsuisartui ukioq kingulleq Ittoqqortoormiiniissimapput. Tamaani nanoq ataaseq qanillattortarsimavoq. Taamaariarmat WWF-ip alapernaarsuisartui ilulerit kummiusut atornissaannut politiinit akuersissummik piniarsimapput, akuerineqarlutillu. 

- Nanoq arlaleriarluni utertartoq Ittoqqortoormiini innuttaasut toqukkusuinnaleraat ilulerit kummiusut atorlugit marlussoriaq aallaavarput. Nanoq uteqqinngilaq, Kaare Winther Hansen oqaluttuarpoq. 

Qasilisoornartoq atussallugu piukkunnanngitsoq

Seqqittaat qasilisoornartulik iluatsittumik atussagaanni nanoq qanillilluartariaqarpoq, tamannalu sillimaniarnermut tunngatillugu isumassarsiatsialaanngitsoq, WWF-imit naliliipput. 

Qasilisoornartoq atussallugu piukkunnanngilaq, tassami meterit qulit iluanni kisima atorsinnaavoq, Winther Hansen oqarpoq, oqaatigalugulu qasilisoornartoq nannumit saassutsinnermi imminut illersornissamut atugassiaasoq. 

Taamaammat ilulerit kummiusut atorneqarsinnaalernissaat, Kaare Winther Hansenip siunnersuutigerusuppaa.

AAMMA ATUARUK Kujataani nannuttassat tamakkerneqartut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!