Ilisimasallip ammasumik pisoqarnissaa amigaatigaa
- Misileraanermi eqqugaasut utoqqatsernerup matoqqasumik ingerlanneqarnissaanik kissaateqarlutik oqanngikkaluartut taamatut pisoqassaaq.
- Utoqqatsernerummi isumavia tassaagaluarpoq pisimasup qulaarnissaa - ammasumik saqqummiunneqarnissaa, taamaaliornikkut susoqarsimanera kikkunnut tamanut saqqummiukkumallugu. Sunaana utoqqatsissutiginiaripput? Matumanilu killorpiaanik iliortoqalerpoq, Maria Rytter DR-imut taama oqarpoq.
Aamma atuaruk ASSIT Meeqqat "misileraataasimasut" sisamat maanna utoqatserfigineqarput
Inuiaqatigiit pissussaannik aammalu oqaluttuarisaanermik ilisimatuutut, meeqqat angerlarsimaffiini meeqqat peroriartornerat ilisimatusaatigisimavaa aammalu Australiami meeqqat 70-ikkut tikillugit assingusumik pineqarsimasunut utoqqatsissuteqartoqarsimanerata qanoq isumaqarnera misissorsimallugu.
Maria Rytterip erseqqissaatigaa utoqqatsissutip pimoorullugu akuerineqarnissaanut suli annertunerusumik iliuuseqartoqartariaqartoq.
- Utoqqatsissuteqarnerit malunnaatillit, soorlu assersuutigalugu Sverigemi meeqqat angerlarsimaffiini alliartorsimasunut tunniunneqarsimasut qiviaraanni, tamanna ministeriunerup dronning Silviallu peqaaffigisaannik 2011-mi tv-kkut persuarsiutigineqartumik ingerlanneqarput: Utoqqatserpugut, ammasumillu tamanna pivoq, Maria Rytter nassuiaavoq. Taanna aamma isumaqarpoq taarsiivigineqarnissaat pisariaqaraluartoq.
Aamma atuaruk Meeqqat pinngitsaalillugit aallartinneqartut utoqqatserfigineqanngillat
Aamma atuaruk Kalaallit meerartaannik misileraanermut peqataasimanini Red Barnetip ajuusaarutigalugulu utoqqatsissutigaa
- Tamannarpiaq ajornartorsiutaalluarsinnaavoq. Pisimasut qulaajaaffigineqarnissaat utoqqatsissuteqarnissarlu kissaatigineqanngillat, danskillu naalakkersuisuisa taarsiissuteqarnissaminnik kissaateqannginnerat innersuussutigalugu. Tamannami pisortatigoortumik utoqqatsissuteqarnikkut aqqutissiuunneqarsinnaassagaluarmat.
Danskit naalagaaffiata suliniaqatigiiffiit Red Barnet aamma Røde Kors suleqatigalugit misileraanissaq 1951-imi aallartisarpaat. Meeqqat 22-usut ukiup aappaa avillugu Danmarkimeereernerini 16-it Nunatsinnut angerlartinneqarput, arfinillit ilaqutariinni danskini qitornarsianngortinneqarlutik. Meeqqat 16-it Nunatsinnut uteramik ilaquttaminnukartinneqaratik Nuummi meeqqat angerlarsimaffiannut inissinneqarput. Misileraanerup ingerlanerani oqaatsiminnik kulturiminnillu annaasaqarsimanerat tamatumunnga pissutaalluni.
Aamma atuaruk Danskit naalagaaffiat kalaallit meerartaannut utoqqatsertariaqarpoq
Meeqqat Danmarkiliartinneqarnerinit ukiut 64-it qaangiutillartullu eqqugaasut Red Barnetimit pisortatigoortumik utoqqatserfigineqarput.
"Utoqqatserfigineqarnissap utaqqinera" KNR TV-kkut unnugu nal. 22 isiginnaarsinnaavat. Taanna meeqqat 1951-mi Danmarkimut aallartinneqarsimasut, Kristine Heinesenip aamma Carla Lucia Knakkergaardip, misigisaannik piviusulersaarutaavoq.
