Politimesteri: Illunik nakkutilliineq ingerlalluarpoq
Uummannap nunaqarfiini Nuugaatsiami Illorsuarnilu innuttaasut qimagutitinneqarnikuupput, taamaammat ilaatigut illut, pisattat, angallatit qimmillu qimaannarneqartariaqarsimapput.
Politiilli taakkuninnga nakkutilliinerat pitsaasumik ingerlammat innuttaasut qimaannakkatik ernummatigissanngikkaat, politimesteri Bjørn Tegner Bay oqarpoq.
AAMMA ATUARUK Sisak qimagussorneqartut atisassaannik nassarluni Uummannamut tikittoq
- Ataatsimilluunniit ajornartorsiuteqarnikuunngilaq, politimesteri Bjørn Tegner Bay oqarpoq.
Nuugaatsiami Illorsuarnilu innuttaasut pisattatik, illutik, qimmitik atortutillu allat qimallugit qimagutitinneqarput.
Nuugaatsiami kommunefogedi Mikkel Jeremiassen naapertorlugu inuit tassanngaannaq pigisatik tukiinnarlugit aallartariaqarsimasut soorunami qimatamik akornanni annaarusunngisaminnik peqarput.
Nunaqarfiilli inoqanngitsut politiinit nakkutigineqarluarput qimmillu nunaqarfinniittut aamma isumagineqarlutik.
Tamannalu pissusissamisut ingerlanneqarsimasoq, politimesteri nassuiaavoq:
AAMMA ATUARUK Nunaqarfiit inoqanngitsut politiit nakkutigigaat
- Taamatuttaaq inunnik nunaqarfinnukartunik innuttaasullu pigisaannut innimiilliortunik siumugaqanngilagut. Ataatsimilluunniit tamakkunatigut ajornartorsiuteqanngilagut, inuiaqatigiillu politiit suliaannut paasinnilluartorujussuupput, politimesteri oqarpoq.
Politiit angallatertik Sisak IV atorlugu nunaqarfiit imaanit ulloq unnuarlu nakkutigaat. Politimesterillu innuttaasut ernummateqarsinnaasut paasilluarsinnaavai. Kisianni inuiaqatigiit pisumi ataqqinninnerujussuat paasinninnerallu qularutissaanngitsoq, taanna oqarpoq.
- Paasilluarsinnaavara inuit inigisaminnit tassanngaannartumik qimagutitinneqarsimasut ernummateqassappata. Kisiannili nalornissutigissanngilaat pigisaat nakkutigilluarneqarmata, tamannalu pingaartillugu aalajangiunneqarnikuuvoq Sisak IV atorlugu nakkutilliisoqassasoq, politimesteri Bjørn Tegner Bay oqarpoq.
