Illuatungiliuttut isornartorsiuinerannut Randi akissuteqarpoq

Illuatungiliuttut isornartorsiuteqarnerannut Aningaasaqarnermut aatsitassanullu naalakkersuisunngoqqammersoq, Randi Vestergaard Evaldsen maanna akissuteqarpoq.

- Randi Vestergaard Evaldsenimut unammillertut marluk, Justus Hansen taavalu Poul Hansen, taakkua siulittaasunngussagaluarunik qularnanngitsumik naalakkersuisoqatigiinni malinnaalluarnissaq tunaartaralugu, naalakkersuisoqarfinnut arlaannut ingittariaqassapput taamaasissappallu aamma naatsorsuutigisinnaavarput taava Randi Vestergaard Evaldsen tunuartariaqalissasoq. Taamaammat taannartaa naapertuutinngitsorujussuuvoq, Partii Naleraq sinnerlugu Inatsisartunut ilaasortaq, Per Rosing-Petersen oqarpoq.

Aamma atuaruk VIDEO Mittarfiit pillugit suliniutit piiaaviillu Randip piareersimaffigai

Taanna isumaqarpoq Demokraatit siulittaasumik qinersereerpata,  Naalakkersuisumik ivertitsisoqartariaqartoq.

Randi Vestergaard Evaldsenili ernumarujussuanngilaq.

- Isumaqanngilanga ernumanartoq. Demokraatit politikkiat taannaavoq, kinaluunniit aningaasaqarnermut aatsitassarsiornermilu naalakkersuisuugaluarpat, Randi Vestergaard Evaldsen oqarpoq.

Qinersiffiup aallartinneranit naalakkersuisut nikiterneri amerlavallaalissappata inuiaqatigiinnut sunniuteqarnerlussinnaasoq Inuit Ataqatigiit politikkikkut oqaaseqartartuat, Aqqaluaq B. Egede oqarpoq.

Aamma atuaruk Naalakkersuisut nikinnerat illuatungiliuttuninngaanniit apeqquserneqarpoq

Taamaattoq aningaasaqarnermut aatsitassanullu naalakkersuisoqarfik allamik inuttalerneqassagaluarpat sunniuteqarpallaarnavianngitsoq, Randi Vestergaard Evaldsen isumaqarpoq.

- Uanga massakkut ilinniarfigisakka ilinniarfigaakka. Demokraatit siulittaasussarsiornerata inernera takoqqaariartigu, tassanngaanniillu susoqarnissaanik eqqartuilluta. Massakkut oqaatigisinnaanngilara, aningaasaqarnermut aatsitassanullu naalakkersuisoq, Randi Vestergaard Evaldsen oqarpoq.

Aamma atuaruk Demokraatini siulittaasussat sassartut ataatsimik ilapput

Aamma atuaruk Aningaasaqarnermut naalakkersuisoqarfik Randip akisussaaffigilissavaa