Illuatungiliuttut: Ilimmarfik atuarfiilluunniit

Inatsisartut aningaasanut aappaagumut inatsisissaata oqaluuserinera ualip ilarujussuani ingerlanneqarpoq. Akinik assigiikkunnaarsitsinissaq tupigisassaanngitsumik piffissap ilarujussuanik tigusivoq, Siumut-mit, IA-mit Demokraatinillu ukiortaami atuutilernissaa illersorneqarluni.

Aamma Ilisimatusarfissarsuaq Ilimmarfik partiinit kattusseqatigiinnillu oqaaseqarfigineqarpoq. Illuatungiliuttut Ilimmarfiup piviusunngortinnissaa isumaqatigigaluarlugu meeqqat atuarfiisa iluarsartuunnissaat salliutittariaqarsoraat. Augusta Salling ima oqarpoq:

-Atassumminngaanniit oqaatigereerparput meeqqat atuarfii ullutsinnut naleqqussarlugit iluarsartuunneqartariaqartut aamma annertusaaffigineqartariaqartut. Pisariaqartitsimmata salliutinneqartariaqarput. Kingulliit aaqqiiviginissaat ukiuni 15-ini utaqqisinnaanngilagut. Atuarfiit salliutillugit ilisimatusarfissap kinguartinnissaa akornutissaqartinngilluinnarparput, Augusta Salling oqarpoq.

Ilimmarfiup piviusunngortinnissaa 2001-imili akuerineqarpoq.

Nunatta kulturiata ilaa tammassanngippat, pimoorullugu naammassisariaqalersoq, ilinniartitaanermut kulturimullu naalakkersuisoq Henriette Rasmussen isumaqarpoq:

- Namminersornerulersimanitta iluani ilinniartitaanerit piorsarsimasagut nakkariartulernissaat pinaveersimatinniarlugu siunissaq ungasinnerusoq eqqarsaatigalugu piorsaassalluta Ilimmarfik pisariaqartipparput, nangipporlu.

- Akissaqanngilagut nakkartiinnassallugu. Assersuutigalugu taasinnaavakka oqaluttuarisaanermut pingaarutillit toqqarsivimmiittussaagaluit ukioq 2003-mi katersorlugit unitsittariaqarsimagatsigit, inissaarummata.

Henriette Rasmussen aamma oqarpoq katersaatit Groenlandica amerlangaarmata atorluarneqaratik kælderimiitiinnarneqarnerat uggornartoq, atuakkiortut allallu ilisimatusaatitut atugassarigaluarmatigit.

Ilimmarfik 200 millioni koruuninik akeqartussaq 8.000 kvadradmeterisut annertutiginissaa pilersaarutaavoq, ilaatigut isumaginninnermut siunnersortinngorniat tusagassiortunngorniallu ilinniarfii tassaniilissallutik, soorluttaaq Katersugaasiviup allagaateqarfia Groenlandica-lu inissaqartinniarneqartut.