VIDEO Illuaraq eqqumiitsoq kujataani nassaarineqarpoq
Illuaqqap allaaserisap eqqaani videoliaq takuuk. Video videnskab.dk-mit sananeqarpoq, danskisoorlunilu.
Tassami ujaqqat umiatsiatut inississorlugit illuikkiat ukiut 1200-ikkunni 1400-kkulluunniit nalaaninngaanneersuussangatinneqartut nassaarineqarput.
Illuaraq takunikuusanit allaanerusoq, illeqarlunilu ikumaartitsiveqarpoq, taamaanngikkaluarpallu najukkatut takorloorneqarsinnaassanngikkaluarpoq, Nunatta katersugaasivianit Christian Kock Madsen videnskab.dk-mut oqaluttuarpoq.
Illuaqqamilu nassaarineqartut uissuumminarnerulersitsipput.
Illerup tunuani pequtit katersukkat eqqumiitsut nassaarineqarput. Ilaatigut pinguaatit suliareriikkat marluk, aarrit tuugaavi, tuttut nassui, savap kigutaa, savap nassua, puisip saarnga, illaagutit, ukkusissamineq, savik saviminermik sanaaq ipoqanngitsoq, qattaallu kanngussammik sanaap ilamernga.
Illuaqqami nassaassaqarnissaq kialuunniit takorloorsimanngilaa - katersukkallu tupigutsannermik annikinnerulersitsinngillat.
- Eqqarsarpoq: ’Sooruna?’ Eqqumiippallaaqaaq, Christian Koch Madsen Videnskab.dk-mut oqarpoq.
Taamaammallu nassaat nassuiaatersiniarlugit islandimiut oqaluttuaatitoqaanik misissuivoq.
- Nassuiaataasinnaasutut nassaarisinnaasatuara tassaavoq, islandimiut oqaluttuaatitoqaanniittoq. Uanilu Kalaallit Nunaanni qallunaatsiaat angakkuat eqqumiitsunik assigiinngitsunik pequtaateqartoq ataasiaannarluni nassuiaatigineqarsimavoq, Christian Koch Madsen oqarpoq.
Nunat avannarliit oqaluttuatoqqanik ilisimatusaataat naapertorlugu qallunaatsiaat angakkuat siulittuisartuusaavoq, siulittuinissamik piginnaaneqarpoq, angakkorsernissamillu ilisimasaqartuulluni - tassa tarnit nunarsuarnut allanut angalatillugit paasisassarsiortinnissaanut ilisimasalik.
- Taamaammat taanna eqqumiitsunik pequtilik 12 hunnorujukkunni ilisiitsuusimasinnaavoq, Christian Koch Madsen videnskab.dk-mut oqarpoq.
