Illu sukkasuumik sanavaat
Nunatsinni inissianik sanaartorneq silamit akornuserneqarsinnaasarpoq isugutak apullu kinguaattoorutaasarmata ilaatigullu aamma illut pitsaassusaannut apparsaataasarlutik.
Ingeniørit siunnersuisartut illussanillu titartaasartut Masantimeersut ukiorpassuarni isumaliutigisarsimavaat tamanna qanoq qaangerniarneqarsinnaanersoq. Maanna killiffigaat sanaartornermi atortut iluitsukaanngorlugit suliarisarnissaat. Tassani ikkat amerlanersaat fabrikimi piareerlugit suliarineqarput.
Taamatut misiliineq siulleq Upernavimmi siorna pivoq illu nutaaq ullut tallimat ingerlaneranni matuneqarmat. Sanaartornermilu ullut ikinnerit atorneqartalerpata akikinnermik sanaartortoqarsinnaalissaaq.
- Piffissarujussuaq sipaarneqarpoq ullut ikittuinnaat ingerlaneranni illu matuneqarmat. Tassani ukiuunerani aningaasartuutigineqartartunut soorlu aputaajaanermut aningaasartutit sipaarneqarput, Masantimi ingeniøriuneq Anders Dyrhave KNR-imut oqarpoq.
Masantip siusinnerusukkut Grønfeldt Elementer suleqatigisarsimavaa taakkulu XL-Byg-ip ingerlataasa ilagaat. Nammineerluni illuliat Namminersornerullutik Oqartussat nalaani sananeqartarallarmata atortussanik Grønfeldt Elementer sanaartortuupput.
- Taakkulu suleqatigiilluta ineriartortissimavagut illuliassat Kalaallit Nunaanni sanaartornermut ilissikkat aammalu assartuinermi atugassarititaasunut naleqqussakkat, Anders Dyrhave oqarpoq.
Maannamuugallartoq illu ataaseq katiteriaanneq Upernavimmi sananeqarpoq. Illu taanna ullut tallimat ingerlanerinnaanni matuneqarpoq, sulili sukkanerusumik suliarianeqartarnissaat eqqarsaataavoq.
- Kisitsisinik taasaqarsinnaanngilanga. Kisianni siunissami taamatut sanaartornikkut illut akikinnerit sananeqarsinnaapput, sanaartornermi piffissamik atuineq annikillingaatsiarmat, Anders Dyrhave oqarpoq.
