Illu annaanneqarsinnaasimanngilaq

Illu Qaqortumi Hastrupvejimi ataasinngormat sisoorfigitittoq isaterneqarpoq. Illu pequttallu annaanneqarsinnaasimanngillat sisoortoqaqqinnissaa ulorianarpallaarmat.

- Illumulluunniit iseqqusaanngilagut illu sisooqqeriaannaammat, illup piginnittua Isak Motzfeldt, Iisaavaraq, KNR.gl-imut oqaluttuarpoq.

Aput imerlu illup iluanut isaasimapput aseruatiterisimaqalutik. Taamaammat sillimmasiisarfik isumaqatigereerlugu illu isatertiinnarparput, Isak Motzfeldt oqarpoq.

Ippassarlu tassa nivattaassuit illu 2001-ip naalernerani iserterfigineqarnissaminut piareersimasoq isaterpaat amiilaarnartumik pisoqarneratigut oqaluttuaannanngortoq.

- Ataasinngornermi ullaakkut aput sisoormat siniffimmi nalavunga. Tupannartorujussuuvoq, Isak Motzfeldt oqaluttuarpoq.

- Nuliara ippassaammat unnuap qeqqalersoq panitsinnukarpoq unnuiartorluni. Taamaasinerani aarleqqutigilereerparput aputip sisoornissaa. Unnuaq taanna aamma uanga sinippianngilanga siallertorujussuummat.

- Assorujussuaq tupannarpoq illu sisoorussaammat apullu isaasorsuanngorluni. Allatut ilioriarsinnaannginnama siniffimmiiginnarpunga allallu ikiuunnerisigut aatsaat illumit anisinnaalerlunga, Isak Motzfeldt qimmertik ilagalugu aputip sisoornerani illumi kisimiittoq oqarpoq.

Maanna sillimmasiisarfillu attaveqatigiinnerit ingerlapput. Eqqaaneqareersutut illu tamarmi isaterneqareerpoq pequttallu ilaat containerimut inissinneqarput kingusinnerusukkut piginnittunit nalilerneqassallutik arlaat annaanneqarsinnaanersut.

Illup sisooqqissinnaanera uloriagalugu pequttat annissorneqarsinnaasimanngillat. Tassalu isumannaallisaaniarneq pissutigalugu illu pequttallu ippassaq nivattaassuarnit isaterneqarput.

- Misigisaq assorujussuaq avaanngunarpoq, Isak Motzfeldt naggasiivoq, kissaatiginerarpaalu illumik napareersumik pisaarnissartik.