Inuussutissarsiutit Avatangiisit

Illorsuassaq takornariartitsinerup ineriartortinneqarneranut pingaaruteqarluinnartoq

Ilulissat Kangianni illorsuassaq ilusinikkiartorpoq. Illorsualiassamillu titartaasussat toqqarneqarnerat alloriarnerujussuusoq, inuussutissarsiornermut naalakkersuisoq, Vittus Qujaukitsoq oqarpoq.

Allattoq Ivik Kristiansen

juunip 27-at 2016 10:39

Vittus Qujaukitsoq taama oqarpoq, Qaasuitsup Kommunianilu borgmesteritut, Ole Dorphitut illorsuassamut isumalluarpoq.

Illorsuassaq 2020-imi ammarneqarpat, takornariat 25.000-it ukiuni siullerni takkuttarnissaat naatsorsuutigineqarpoq, ukiullu ingerlanerini amerlanerujartornissaat naatsorsuutigineqarluni, Isumalluarnissamullu tunngavissaqartoq, Vittus Qujaukitsoq oqarpoq.

Aamma atuaruk Ilulissat Kangianni illorsuassamut isumalluartoqartoq

Illorsuap 116 millionit koruuninik akeqarnissaanik missingersorneqarpoq. Namminersorlutik Oqartussat 15 millionit koruuninik tapiuteqarput, Qaasuitsup Kommunia 8 millionit koruuninik tapiuteqarluni, Realdanialu 83 millionit koruuninik illorsuassamut tapiuteqarluni.

Taamaammat 10 millionit koruunit suli amigaataapput, taakkuli pissarsiarineqassaqqaartut, Vittus Qujaukitsoq oqarpoq.

Aamma atuaruk ASSIT & VIDEO Ilulissat Kangiat pillugu Ilisimatusarfittaassaq piviusunngoraluttualersoq