Illersortakkavit unammisassai takukkit

Ukioq manna pissartanngorniuunnissami aaqqissuisut, Kâgssagssuk Maniitsumeersut, dommeriusussat peqatigalugit unammisaqattaartussanik ippassaq makitsimmata Facebookikkut toqqaannartumik malinnaatitsipput.

Unammisaqattaartussat siulliit tassaapput: N-48 Ilulissaneersut, NÛK aamma B-67 Nuummeersut, K-33 Qaqortumeersut aamma T-41 Aasianneersut.

Unammisaqattaartussat aappaat tassaapput: FC Malamuk Uummannameersut, K-64 Kuummiuneersut, Kâgssagssuk Maniitsumeersut, IT-79 Nuummeersut kiisalu Kugsak Qasigiannguaneersut. 

Unammisaqattaartussani marluusuni angusarinnerit marluk, tassa katillugit holdit sisamat, semifinaalimut ingerlaqqissapput.

Unammisaqattaartussani siullermi N-48, ukioq kingulleq finaalimi ajorsartut, aamma B-67, ukioq kingulleq angusarloqalutik kingulliit tulliattut inissittut, ukioq manna semifinalimut annguttussatut ilimanaatilittut taasariaqarput. Taamaakkaluartoq K-33, ukioq kingulleq bronzinnattut, semifinaalimut annguteqqerataannaapput. Taamatuttaaq NÛK, inuusuttunik pikkorissunik inersimasunillu misilittagalinnik arsartulik, tupaallatsitseriaannaapput. T-41 aamma taamaaliorsinnaapput, taakkumi G-44 ajugaaffigalugu GM-imut anngupput. 

Unammisaqattaartussat aappaannittut IT-79, pissartaasut, pissartanngoqqinnissaat ilimanaateqarpoq. Kâgssagssuk, ukioq manna klubbiat 80-inngortorsiortoq, semifinalimut ingerlaqqinnissaat aamma ilimanaateqarpoq. Unammisassaalli sukataallaqqissuupput, taamaammallu pulje taanna naligiiffioratarsinnaalluni.  

AAMMA ATUARUK Klubbit qulit futsalimik pissartanngorniuunnissamut piareertut

Kâgssagssuk pissartanngussagaluarpat klubbimut pingaaruteqarluinnassaaq, tassami ukiuni 80-nngortorsiorput. Taakku ukiuni kingullerni Ole Martinsen, sungiusaasutut siuttoralugu, Nunatsinni maluginiarneqarnikooqaat. 

Kâgssagssuk inuusuttunik piumassusilinnik arsarnermillu nuannarisalinnik unammisartoqarpoq. Taakku pissartanngorniuunnermi tamaviaassasut qularnanngilaq. Ajoraluartumik unammisartui marluk, nunanut allanut unammisartuni peqataasartut Nathan Møller aamma Søren Kreutzmann, ajoqusersimallutik pissartanngorniuuteqataanissaat qularnarput. 

- Unammersuaarnermi unammisassagut assigalugit unammersuaarneq pitsaanerpaamik angusaqarusulluta GM-imi takutitsiniarsarissaagut, Kâgssagssummi sungiusaasoq Ole Martinsen KNR-imut oqalrpoq, nagillunilu;
- Arsartut timimikkut aamma arsariaatsitigut piareersarput. Pitsaanerpaartagut marluk unammersuaarnissaminnut nalorninartumik inissisimaneri uggornanaaqqalaarparput, taamaakkaluartoq unammisartoqatai piareerluariartorput.

Kâgssagssuk ungasinngitsukkut klubbit assigiinngitsut sungiusaatigalugu unammiartorlugit Nuummiippoq.

Pissartanngorniuunnerit apriilip arfernaniit qulingiluaanut pissapput.