NIISIP: Iliuuseqartoqarniarnera pitsaasuuvoq
Kommuneqarfik Sermersuumi meeqqat inuusuttullu sullinneqarnerat pitsanngorsarniarlugu kommune iliuuseqarpoq, ilaatigut immikkoortortami pisortamik atorfinitsitsilluni.
Tamannalu Nunatsinni Inunnik Isumaginninnermik Siunnersortitut Ilinniarsimasut Peqatigiiffiannit nuannaarutigineqarpoq. Pilersaarutilli annertuut qanoq piviusorsiortiginersut apeqquserpaat.
---
Kommuneqarfik Sermersuumi meeqqat inuusuttuaqqallu ikiorserneqarnissaat pillugit iliuseqartoqalermat, Nunatsinni Inunnik Isumaginninnermik Siunnersortitut Ilinniarsimasut Peqatigiiffiannit nuannaarutigineqarpoq.
- Qanoq iliorluni ajornartorsiutit aaqqiivigineqarnissaat pilersaarusiorneqarmat, NIISIP-imiit nuannaarutigaarput. meeqqanik annerusumik ukkatarinniffiusumik, ingerlatsivimmik nutaarluinnarmik pilersitsisoqarnera, polittikkikkullu ukkatarinninnerulerneq immini nuannersuuvoq, Malene Krogh oqarpoq.
Suulli tamarmik imaaliallaannaq aaqqinnavianngitsut, peqatigiiffimmiit eqqaasissutigineqarpoq.
- Siunnersuutigineqassajunnarsivorli meerartagut inuusuttortagullu nunatsinniittut qanoq iliuornikkut pitsaanerusumik ikiorsinnaasanerigut. Nerioqaagullu pisariaqartunik aningaasaliiumaartut, Malene Krogh oqarpoq.
AAMMA ATUARUK Isumaginninnikkut sullissineq pitsanngorsarneqassaaq
Meeqqat inuusuttuaqqallu isumaginnittoqarfimmut nalunaarutigineqartut ingerlaannartumik - tassa akunnerit 24-it qaangiutsinnagit suliarineqartalerneri aamma peqatigiiffimmiit nuannaarutigineqarpoq. Kommuninilu inunnik isumaginnittut sulinerminnut atatillugu imaajartittalernissaat suliniutigineqarniarmat iluaraat.
- Sulinitsinni imaajartittarnissaq ujartortarnikuuarput. Oqimaatsunik suliaqarsimatilluta imaajartittarnissaq pisariaqartittaqaarput. Taama p9neqartalernissarlu neriuutigaarput. Politikkerimmi taama siunniusaqarput, Malene Krogh oqarpoq.
Inunnik isumaginnittut suliassaqarpallaarujussuartartut, peqatigiiffiup ukiorpassuanngortuni suaarutigisarpaa.
- Taamaanneralumi meeqqanut eqquisuusoq arlaleriarluta oqaatigisareerparput. Pisortat sumiginnaanerani peqataavugut, tamaaneralu akisussaaffigisinnaanngilarput. Inunnik isumaginnittunik taamannak akisussaaasoqarsinnaanngilaq. Nilliaatigiuarparput, meeqqallu ikiorniarneranni atugarissaarnerulertariaqarnitta ukkatarineqarnissaanut una iluaqutaassasoq nerioqanga, NIISIP-imi ilaasortaq Malene Krogh oqarpoq.
AAMMA ATUARUK Meeqqanut tunngasunik suliat misissoqqissaarneqalerput