Ilisimatuut uumassusilinnik pisoqarujussuarnik nassaaqqittut
Nuup Kangerluani uumassusilinnik pisoqarujussuarnik nassaartoqaqqippoq. Videnskab.dk taama allaaserisaqarpoq.
Danskit ilisimatuut eqimattat atortorissaarutit nutaaliat atorlugit uumassusilimmik pisoqarujussuarmik tassa 3,7 milliardit matuma siornaneersunik nunatsinni ujaqqamit erlinnartumik nassaarput. Nunarsuatsinni oqaluttuarisaanermi pisoqaanerpaat ilagaat, Minik Rosingillu Isuani uumassusilimmik nassaarinikuusaanut uppernarsaataasoq, Videnskab.dk allappoq.
AAMMA ATUARUK Nunarsuarmi ujarannguunnikut pisoqaanersaat Nunatsinni nassaarigaat
AAMMA ATUARUK Ujarannguussimasut saqqummersinneqarnissaat tamatsinnut iluaqutaasussaasut
Nassaarineqartoq atuagassiamut Naturemut ataqqisaavoq aammattaaq nunarsuarmi qanoq sivisutigisumik uumassusilimmik peqarsimaneranut pingaaruteqangaatsiarpoq.
Minik Rosingip nassaarisimasai uppernarsarneqartut
Tassami kialuunniit ilisimasimanngilaa nunarsuarput qangarpiaq qanorlu pilersimanersoq, Minik Rosingip 2000-ikkut aallartinnerani nassaavanit nunarsuup pilernera ukiunik 200 millioninik suli pisoqaanerusoq paasineqarsimavoq.
Uumassusillik pisoqqat
Nunarsuarmi uumassusillit pisoqaanerpaat qangameernersut assigiinngitsunit eqqoriarneqarsimapput.
Isuani nassaarineqartunit uumassusillit ukiut 3,7 milliardit matuma siornaneersuussangatinneqarput.
Canadami uumassusilinnik nassaarnernit ukiut 3,77-it 4,28 milliardillu akornanni pisoqaatigissangatinneqarput.
Ilisimatuut allat Australiami nassaaminni uumassusillit ukiut 4,1 milliardit matuma siornaneernerarpaat.
Tigusiffik Videnskab.dk
- Uani nutaartaallunilu pissanganaqutaa tassaavoq maanna tassa uumassusilimmik peqarsimaneranut takussitissaqarlualermat, professor Bo Barker Jørgensen Videnskab.dk-mut oqarpoq.
Toqutsisoqarnerani suliamut sanilliunneqarsinnaasoq
Isornartorsiuisoqarporli taakku nassaarineqartoq mingutsinneqarsimasinnaasoraat. Ilisimatuulli misissuisut tamaattoqannginnerarpaat. Taakku naapertorlugit nassaarineqartoq ajunngitsorujussuuvoq siusinnerusukkullu nassaarineqarsimasumut uppernarsaataasinnaanerarpaat.
AAMMA ATUARUK Uumassuseqarnerup pinngorneranik apeqqut Isuani akissutissarsiniarpaat
- Toqutsisoqarsimaneranik suliamut sanilliunneqarsinnaavoq. Uppernarsaataasinnaasut amerlanerutillugu pitsaanerpaavoq. Nassaarineqartut uppernarsaatillu maannamut nassaarineqarsimasut naapertorlugit oqaatigineqarsinnaavoq uumassusilimmik peqarsimavoq, Tue Hassenkam Videnskab.dk-mut oqarpoq.
