Ilisimatusarfimmi ullumi allagartartaartitsisoqassaaq
Ilisimatusarfimmi bachelorinngortut 34-t kandidatinngortullu tallimat ukiumoortumik nalliuttorsiortitsinermi ullaap tungaani nalunaaqutaq qulinut aallartittussami allagartartaartinneqassapput.
Isumaginninnermut tungasunut immikkoortortaqarfik amerlanerpaanik bachelorinngortitsissaaq, inunnik isumaginninnermi siunnersortitut bachelorinngortut aqqaneq-marluussammata.
Tullersortaapput tusagassiornermik bachelorinngortut arfinillit, ukiut 20-t ingerlaneranni aatsaat taama amerlatigisunik naammassisoqarmat.
Bachelorinngortut kandidatinngortullu 39-iusut soraarummeerusiaminni assigiinngitsorpassuarnik sammisaqarsimapput - ilaatigut "Kalaallit Nunaata danskit naalagaaffiannut ilanngunnera", "kalaallit eqqumiitsuliortut mutilerisullu akornanni ilisarnaatinik kulturimut tunngasunik atuineq" aamma "kalaallisut oqaasilerinermi uniffilersuisarneq", Ilisimatusarfimmi Instituttimi pisortaq Mette Sonniks taama oqaluttuarpoq.
Nalliuttorsiornermi pisussat ilagaat oqalugiarnerit nersornaasiinerillu. Ilasseqatigiissitsinermilu erinarsortartoq Thelma Kajsdottir Lyberth allagartartaartunut, ilaqutaasunut, ilinniartunut allanut, qaaqqusanut ilinniartitsisunullu aliikkusersuisuussaaq.
